Home General “Tucibi Rosa” of “Cocaine Rose” ta e droga di mas peligroso y...

“Tucibi Rosa” of “Cocaine Rose” ta e droga di mas peligroso y mortal na e momentonan aki

232
0
SHARE
- Advertisement -

Bon pa ta na haltura na Aruba tambe:

ORANJESTAD (AAN) – Un programa produci pa Caracol TV di Colombia tur Diadomingo, cu yama “Septimo Dia” tin su grupo di televidente na Aruba tambe.

Un programa di periodismo profundamente investigativo, cu ta aporta informacionnan hopi relevante, manera ta e caso di Diadomingo cu a pasa.

Den e investigacion cu a keda publica e protagonista ta e droga di mas peligroso, mortal y costoso cu ta circulando na Colombia na e momentonan aki, pero tambe na otro paisnan di America Latina y na Europa.

E droga aki no ta nada otro cu cocaina sintetico, den forma di puiro pero tambe nan ta traha den forma di bolita cu ta parce mangel.

Y un tristeza grandi ta cu e ta produci na Hulanda, di aki distribui na henter Europa y tambe ta yega na Curacao for di unda e distribucion pa Colombia a inicia y di aki na resto di Centro y Sudamerica.

E investigacion a dura como dos aña unda un polis a infiltra den un grupo di musico, di cual e vocalista principal ta Hulandes. E resto ta Colombiano. E polis a bin descubri tur e modus operandi ora el a bira “miho amigo” di e cabes di e organizacion.

Casualmente e polis ta traha tattoo y asina a logra infiltra sin lanta sospecho cu e ta haciendo un trabao di investigacion unda a graba y saca hopi informacion di celular y computer cu e tabata pasa pa e comando concerni.

El hasta mester a uza droga den casonan sumamente necesario pa no pone su mes bida na peligro, kiermen cu e lo por a wordo asesina.

Den e dianan aki polis antidroga na Bogota a captura cada un miembro di e banda musical y awor nan ta den prison pendiente di e huicio den Corte.

Un hecho cu a conmove e televidente local, ta di un hoben cu a wordo bon lanta pa su mayornan. Potretnan cu por a mira ta mustra un mucha chikito hopi stima, cariñoso cu a stima su mayornan, pero na su 13 aña el a cuminza uza marihuana.

Te su 15 aña e mayornan a ripara cu algo no tabata bon cu e hoben y bin constata cu e tabata den e rednan di uso di droga. El a cuminza faya na scol, desobedece su mayornan, bende su pertenencianan, y cada bez cu e mayornan tabata paga un lugar di rehabilitacion pe, nan tabata haya speranza cu e lo recupera pero tabata cay bek.

Na aña 2017 tog el a drenta universidad den tres ocasion pero ta e tempo ey a ser conoci cu “Tucibi Rosa” of “Cocaine Rose” y su mayornan no por a haci nada mas pe. El a drenta na un centro di rehabilitacion bek y el a laga nan filma un video cu tabata manera un despedida, pasobra e tabata sa cu loke e ta haci no ta bon, pero e droga a penetra den dje mas fuerte.

E aña aki mes e hoben a bolbe su cas aparentemente rehabilita pero di ey a sali un dia bisa cu ta universidad e ta bay pero no tabata e caso. El a bay busca e cocaina sintetico aki y nan a haye agonizando den un parke y di eynan a bay un hospital di unda e mayornan a wordo yama cu e noticia cu e hoben a fayece.

Pues ban tuma nota na Aruba tambe di e nomber di e droga aki, y alerta nos muchanan pasobra esnan cu ta distribui e (ohala e lo no yega Aruba y autoridadnan concerni por ta alerta) ta haci den auto acercando muchanan di scol basico y adolescentenan di secundario.

- Advertisement -

DUNA COMENTARIO

Please enter your comment!
Please enter your name here