Home General Un coneccion maritimo entre Aruba y Corsou ta e meta primordial di...

Un coneccion maritimo entre Aruba y Corsou ta e meta primordial di Proyecto Fast Ferry

21
0
SHARE
- Advertisement -

 

ORANJESTAD (AAN):  For di momento cu Minister Chris Romero a tuma encargo di, entre otro, Ministerio di Transporte, el a pone como meta pa haci di e Proyecto Fast Ferry entre Aruba cu Corsou bira un realidad.

Teniendo e pueblo di P’ariba di Brug como un di su prioridadnan semper, Minister Romero ta premira cu e Proyecto di Fast Ferry lo ta di gran beneficio pa San Nicolas y Aruba completo.

Un coneccion maritimo entre Aruba y Corsou ta e meta primordial di e Proyecto di e Fast Ferry, cu lo tin beneficio tanto pa nos sector turistico, comercial, pero tambe lo fortalese e lasonan familiar cu tin entre ambos isla.

Pa tin mas claridad riba e Proyecto Fast Ferry, mester tene na cuenta cu esaki ta un proyecto entre Pais Aruba y Pais Corsou. Esaki no tin nada di haci cu e acuerdo di refineria of cualkier otro ferry cu por a haya problema den nos region.

Den pasado nos a yega di conoce e un model di slow ferry cu tabata carga e nomber di ‘Almirante Luis Brion’ cu tabata nabega, lentamente, entre Aruba y Venezuela – Venezuela y Corsou. Nos por corda cu e tempo ey hopi hoben a participa den e asina yama ‘Plan Vacacional, pero tambe con por a transporta autonan particular cu e ferry ey.

Sinembargo, tin un gran diferencia entre e ferry Almirante Luis Brion y e Fast Ferry cu lo traha awor. E Fast Ferry cu lo mobilisa entre Aruba y Corsou ta uno di calidad halto, totalmente ekipa, cu un capacidad hopi mas grandi y cu gran velocidad pa desplasa den nos awanan.

E Fast Ferry ta tuma unicamente 2 ora pa transporta pasaheronan y vehiculo, for di un punto pa e otro. Den e vehiculonan cu por keda transporta pa e Fast Ferry por menciona autonan particular, pero tambe truck y hasta container. Aki nos ta papiando di un ferry tipo Trimaran cu tin un grandura di mas o menos 100 meter largo y casi 8 meter hancho, cu varios motor grandi pa por ta super lihe.

Minister Chris Romero a percura pa cuminsa pone e Proyecto Fast Ferry cana. For di algun luna caba a cuminsa e asercamento entre Pais Aruba y Pais Corsou pa asina den algun siman firma e MoU corespondiente. E “Due Diligence” na Aruba ta e siguiente paso importate pa tuma pa asina yega na e trimaran na final di 2019 of cuminsamento di 2020. P’esey, un bon palabracion y colaboracion cu Corsou ta di sumo importancia pa realisacion di e Proyecto Fast Ferry.

 

- Advertisement -

DUNA COMENTARIO

Please enter your comment!
Please enter your name here