ORANJESTAD (AAN): Curaçao lo ta anfitrion di un ehercicio Internacional riba dia 6 te cu 15 di November. E ehercicio ta hiba e nomber ‘ Tres colors’.
‘Tres colors’ ta un ehercicio militar cu lo worde realiza na Curacao cu participacion di tanto ehercito Hulandes como ehercito Frances den e region di Caribe.
E ehercicio aki a bin ta ta crece durante aña nan y a bira un ehercicio Internacional sumamente importante. E aña aki e organizacion ta den man di Commandant Zeemacht in het Caribisch gebied (CZMCARIB) e diferente ehercicio nan lo tuma luga riba y alrededor di Curaçao. Tres Colors ta hopi diversifica na miembronan participante.
Aparte di militarnan Hulandes y Arubiano, Curaçaose Militie, Peloton di e FRISC-Bootgroep, detachtamento militar di St. Maarten, e barco logistico Zr.Ms. Pelicaan tambe lo tuma parti di e ehercicio aki. E caracter Internacional lo worde forma cu participacion di e militarnan di “33e Regiment d’ Infanterie de Marine” (RIMA) for di Martinique.
For di 6 di november alrededor di 200 militar lo enfrenta otro den e prome fase di e ehercicio cu conoce un nivel halto di competencia. Den e fase aki e militarnan lo competi riba nan conocementonan militar y fisico.
Manera por ehempel nan lo haya ehercicionan di orientacion, tactico, y tiramento. Tambe nan lo speedmars, un parcour di natacion y lo subi y baha baranca nan den e asina yama ‘ambfische cliff assault’. Cu cada ehercicio por gana of perde punto.
Den e di dos fase cu lo ta di 11 te cu 15 november. E militarnan lo haya nan cu un scenario caminda e unidad nan lo tin cu traha conhuntamente cu otro, pero tambe contra otro pa asina trata na sobresali riba otro. Den e fase aki e obhetivo principal ta pa acorda e diferente procedimento, tecnica y tacticanan.
Asina fortalece e estrecho cooperacion cu e partnernan strategico y asina ta mas mihor prepara pa un posibel colaboracion den futuro. Operabilidad lo por worde realmente poni na prueba y lo tin intercambio di conocemento.
E barco logistico Zr.Ms. Pelicaan lo fungi durante di e ehercicio como plataforma amfibico.
