Besaril: Scarsedad na camber pa studiante ta urgi accion tempran

    561
    0
    SHARE
    - Advertisement -

    ORANJESTAD (AAN): Minister Plenipotenciario, sr. Guillfred Besaril, ta keda enfatisa na tur e studiantenan di Aruba cu kier bini Hulanda na 2019, cu ta sumamente importante pa nan inscribi nan mes pa un camber prome cu dia 1 di November proximo.

    E preocupacion di e mandatario pa loke ta e tema aki a keda confirma pa e Landelijke Studentenvakbond (LSVb) cu recientemente a duna un entrevista na e matutino Hulandes “De Telegraaf” cu a keda publica bou e titulo “Woningnood studenten steeds groter”.

    Den dicho articulo a elabora ampliamente riba e scarsedad grandi di camber pa studiante. Alavez ta remarca cu e prijs pa camber ta keda subi di manera alarmante na Hulanda y ta birando simplemente impagabel pa un studiante.

    LSVb a yega na e conclusion aki basa riba e asina yama Landelijke Monitor Studentenhuisvesting. Segun LSVb Gobierno atravez di e diferente gemeenten lo mester contribui mas cu construccion di camber pa studiante. Segun e organizasion na e momento aki tin un scarsedad di 40 mil camber pa studiante.

    Otro punto den e articulo ta cu pa aña e cantidad di studiantenan internacional – dus pafor di Hulanda – ta conociendo aumentonan grandi. Pa otro aña por ehempel  lo bay conoce un aumento di casi 32 mil studiante! Segun “Kences” cu ta e centro di experticio riba vivienda pa studiante, e necesidad pa camber bou di grupo di studiante internacional ta basta cronico, p’esey lo mester construi y renoba hopi mas camber. Specialmente Delft y Wageningen ta hopi popular bou di studiantenan internacional, segun Kences.

    Enbista di e seriedad di e problema, Minister Besaril ta keda haci un apelacion grandi na e studiante cu ta pensa pa bin studia na Hulanda pa inscribi na tempo. “Arubahuis ta haya e lista di studiante cu ta bin Hulanda un par di siman prome cu nan subi avion. Na e momento cu bo yega Hulanda y bo no tin camber of lugar di keda, ya caba bo ta hopi laat.

    Banda di esnan for di Aruba tin miles di studiante di Hulanda mes y manera bisa den e articulo den De Telegraaf, otro miles di studiante internacional, cu ta busca un camber mescos cu e studiante di Aruba.” Minister Besaril ta remarca.

    Relaciona cu e topico aki Minister Besaril ta mustra riba e serie di articulo cu Arubahuis y e mentornan a bini ta saca den medionan di comunicacion na Aruba riba e problematico di camber pa studiante den e diferente ciudadnan na Hulanda. Tambe cu tur e informacion aki ta disponibel riba e website di Departamento di Enseñansa di Aruba y riba e pagina di Facebook di Arubahuis.

    E potretnan ta cortesia di Cas di Aruba.

    - Advertisement -

    DUNA COMENTARIO

    Please enter your comment!
    Please enter your name here