ORANJESTAD(AAN): Poco despues di 4:00 pm, autoridad a haya sa di un caso serio di maltrato dilanti un cas na Catiri. Aparentemente un persona a agredi un ciudadano asina pisa na su cabez, y a laga e victima eynan atras. E maltrato a socede cu un Bate di Baseball.
Despues di esey, e agresor a drenta den un Toyota Corolla color berde scur, y a bandona e lugar. Testigonan a bisa Polis, cu e number ta A-26177.
Polisnan di Playa y Noord ta esnan cu a yega rapidamente na e adres, y a bin haya e victima banda di caminda grandi, kehando di dolor inmenso na su cabez.
Ambulans tambe a yega, y mesora paramediconan a stabiliza su condicion, y cu urgencia a sali cune pa Servicio di Emergencia di Dr. Horacio Oduber Hospital, pa haci examinacion y tambe scans necesario.
Famia y amigonan na e cas na Catiri tabata furioso cu loke a pasa, y nan tur tabata cla pa subi caya pa busca e Toyota Corolla.
Pero esey no tabata necesario, como cu un rato despues e agresor mes a yega cu e auto dilanti Warda di Polis na Shaba, y a bay paden y entrega su mes. Polis a sali pa asina controla e vehiculo pa check si e bate di baseball ta aden. Den e vehiculo a bin haya un dama y un mucha.
E vehiculo a wordo confisca, y hiba patras pa asina listra esaki.
E agresor a resulta di ta un conocido di Polis. El a keda deteni, y ta wordo interoga awor.
