Home Hudicial Diabierna trio sospecha di atraco arma dilanti Hues

Diabierna trio sospecha di atraco arma dilanti Hues

52
0
SHARE
- Advertisement -

ORANJESTAD  (AAN) – Despues cu na Juli 2018 e caso a bin dilanti pro forma, mayan mainta e hombernan E.A, D.A. y e muher V.G. ta bolbe presenta dilanti Hues pa tratamento di e caso penal cu Ministerio Publico a cuminsa contra nan.

ATRACO ARMA

E acusacion cu Fiscal a presenta den Corte ta cu riba 1 Januari 2018 a saca arma y a forza pa duna placa. D.A. y V.G. ta wordo acusa di incubrimento y ladronicia cu kiebro riba 2 y 3 Januari 2018.

ABOGADONAN PIDI LAGA LIBER

Na Juli 2018, tabatin un discussion interesante entre abogadonan y Fiscal, caminda abogado mr. Carlo a reclama e hecho cu el a pidi documentonan y algun dia promer cu e caso a haya documentonan pero no completo. E abogado a bisa Hues cu e ta haya cu aki tin violacion di norma. A perhudica su cliente D.A. den su defensa door di duna documentonan asina laat. Tur tres sospechoso ta desmenti di tabatin un arma di candela. Ta solamente e victima ta bisa esaki.

Mr. Carlo a mustra cu e victima L., a manda mensahe pa D.A. cu e auto cu bo horta pa trece bek y cu a notifica Polis. Na opinion di abogado, e victima mes ta bisa cu a horta y no ta papia di menaza cu arma. E abogado a bisa cu e otro acusacion, D.A. ta desmenti. Na opinion di mr. Carlo, ariba video lo por mira bon cla cu no ta D.A. El a pidi pa laga D.A. liber pendiente e caso. El a pidi Fiscal pa facilita video cu tin di loke a sosode y pa inclui e mensahenan cu el a presenta den Corte den e documentonan.

Abogado mr. Bryson, cu a representa E.A., a bisa Hues cu e ta uni cu abogado mr. Carlo. El a sigui bisa cu tur e sospechosonan y hasta L. tabata bebiendo y tur tabata burachi. E abogado a bisa Hues cu Fiscal ta bisa cu E.A. lo tabatin arma pero segun denuncia, D.A. lo tabatin arma. Despues L. ta manda mensahe pa D.A. bisa cu ta el a bay cu auto. E abogado ta haya cu tin hopi bruhamento y no ta haya cu nan ta honesto. E ta haya cu a traha storianan cu no ta cuadra cu e berdad. El a pidi pa laga E.A. liber pendiente e caso. E abogado a remarca cu awor ta resulta cu ningun momento tabatin arma di candela envolvi.

Abogado mr. Vrolijk tambe a bisa Hues cu e ta uni cu abogadonan mr. Carlo y mr. Bryson. E abogado di V.G. a remarca cu su cliente V.G. no por ta victima di tardanza. Segun Derecho Humano, e por warda su caso den libertad mirando cu no tin indicacion di su culpabilidad. E abogado a bisa Hues cu e declaracion di L. ta contradictorio. L. hunto cu e otronan den e auto tabata burachi. E ta haya cu V.G. tabata na e lugar robez y na e ora robez.

REACCION FISCAL

Fiscal a reacciona cu e ta kere cu tabatin atraco cu arma. Fiscal a bisa cu e no ta kere cu ta manera ta wordo bisa. Tin declaracionnan cu ta mustra cu e sospechosonan tabatin arma di candela y cu a usa esaki. Fiscal a bisa Hues cu por bien ta cu no tabatin plan pero tabatin cooperacion estrecho. Fiscal a mustra cu tin castigo pisa pa atraco arma. Na opinion di Fiscal, e sospechosonan mes lo a bisa cu lo tabatin arma. El a pidi Hues pa rechaza e peticion pa laga nan liber.

DECISION HUES

Hues a bisa cu e ta haya cu tin motibo di peso. Ta un hecho cu a horta un auto. E cuestion di usa arma di candela of no, ta mucho tempran pa bisa esaki. Ta ora di tratamento di caso, lo saca afor si tabatin arma of no. Hues a remarca cu ta di lamenta cu mester warda te October 2018. Si resulta cu no tabatin arma, lo a keda sinta asina largo. El a rechaza peticion di abogadonan. E tres sospechosonan lo keda sera te dia di e caso cu ta 12 October 2018 pa 9’or di mainta.

 

- Advertisement -

DUNA COMENTARIO

Please enter your comment!
Please enter your name here