Home Policial Dos morto y varios detencion ora boto a yega costa cu hende...

Dos morto y varios detencion ora boto a yega costa cu hende ilegal for di Venezuela

667
0
SHARE
- Advertisement -

Na Santana di Cacho

ORANJESTAD  (AAN): Situacion parce ta for di control na costa y esaki a keda constata ora cu diasabra marduga a sosode un otro tragedia na Santana di Cacho.

Boto cu a yega carga cu hende for di Venezuela na Santana di Cacho a pasa bay pega te riba tera. Asina mes prome cu esey a sosode, e capitan a laga e pasaheronan bula na awa mucho leu for di tera.

Tin cu a yega bon, otro a yega herida y tin dos cu a hoga. E Kust Surveillance a pasa eynan algun minuut prome marduga y no a constata nada. Despues e di dos patruya di Kust Surveillance a pasa y topa cu e boto.

Den marduga a detene tres ilegal.

Segun dia a habri a haya un curpa sin bida. Despues a topa un di dos curpa. E di dos curpa a pega den e barancanan y personal di Kustwacht na tera cu yudanza di Helicopter a logra baha pa asina saca e curpa den e lama bruto.

E investigacion a cuminsa mesora na e sitio. Helicopter a sigui cu buskeda mientras cu e investigacion tabata continua. E boto tabata tin varios tanki di gasolin pa asina bolbe Venezuela. Aunke e capitan a baha e tripulantenan leu for di tera, asina mes cos a bay robez y el a drenta un pida boca y termina na Santana di Cacho riba tera.

Durante dia e buskeda pa mas ilegal a continua. Asina Mobiele Eenheid a logra haya dos ilegal casi na salida di Colony. Despues di merdia mientras tabata saca e boto pa hibe warda, a bolbe topa otro dos scondi den e mondi patras di Centro Colorado. A detene e dosnan aki tambe.

Polis no ta descarta mas morto na costa banda di Santana di Cacho. E Capitan awor sea a wordo gara den e prome grupo, of ainda e ta riba tera moviendo despues cu e boto a pega den tera. Ta sinti cu tin hende local ta yudando e hendenan aki. Nan ta vigila e costa den forma scondi y djey manda e señal pa e boto drenta na momento cu e patruya a pasa bay despues di su control.

Hopi di e hendenan cu ta bin ta risca nan bida. Nan lo ta wordo avisa na Venezuela cu e cos ta hopi sigur pa cruza lama y yega Aruba. Sinembargo e realidad ta otro pasobra no ta prome biaha cu ta haya hende morto cu a hoga bulando na awa pa purba yega tera.

Presente na Santana di Cacho a mira e personal di Kustwacht, Polis Maritimo, K9, Mobiele Eenheid, BFTO, Departamento di Droga etc. Tanto riba tera como tambe riba lama tabata tin hende di Kustwacht druk bezig. E personal di Kustwacht no a mira e contacto via radar. Esey a haci cu no a prepara pa yegada di e boto of intercepta esaki riba lama.

Parce cu pa siman ta yega mas boto baha hende den lama y bay bek sin cu nan ta wordo gara.

 

- Advertisement -

DUNA COMENTARIO

Please enter your comment!
Please enter your name here