Home Economia Economizacion structural riba entre otro personal, ta sumamente necesario

Economizacion structural riba entre otro personal, ta sumamente necesario

202
0
SHARE
- Advertisement -

CAft:  e situacion di finanzas na Aruba ta preocupante

ORANJESTAD  (AAN): Diabierna CAft a tene un conferencia di prensa, den cual presidente di CAft  Raymond Gradus a cuminza na bisa cu e situacion financiero di Aruba ta sumamente preocupante, unda cu e debe  ta na casi 90% di e GDP di Aruba.

El a trece dilanti entre otro cu pa yega na finanzas publico sostenible,  CAft ta recomenda pa implementa economizacion structural den e presupuesto. E gastonan lo aumenta den e proximo añanan debi na subida di e tazanan di interes y e pagonan di disponibilidad di e Public-Private Partnerships (PPP).

Pa yega na reduccion di e quota di debe, surplus den e presupuesto ta necesario den e proximo añanan. Relaciona cu esey reduccion structural di e gastonan di personal ta inevitable.

Pa yega na finanzas publico sostenible, Aruba mester percura pa economizacion structural di gasto. E proyecto di presupuesto pa 2019 ta cumpli cu e norma presupuestario previsto di -0,5% pa 2019. Sin embargo, e norma aki lo subi te na +0,5% y 1% den e añanan siguiente. Banda di esey, tin indicacion di aumento di e gastonan di interes, pa motibo cu e debe publico ta yega na casi 90% di e PIB y e tasanan di interes internacional ta mustra un aumento.

Segun Gradus, a wordo palabra cu pa 2027 e debe mester ta na 70% di GDP of menos y pa 2039 esaki mester ta na 50% of menos.

E presidente a sigui bisa tambe cu e pagonan di disponibilidad di e proyectonan PPP lo aumenta considerablemente den e proximo añanan. Sin e expectativa di ingreso mas halto, economizacion structural di gasto ta necesario.

El a trece dilanti tambe cu 70% di e entradanan di pais Aruba ta wordo gasta na paga interes, mientras cu 10% ta wordo uza pa paga e gastonan di personal.

Gradus a sigui bisa cu reduccion di e gastonan di personal di Aruba ta un manera necesario pa hiba e pais pa dilanti. Den e trayecto di tende tur dos parti anteriormente e aña aki un di e tres recomendacionnan di CAft tabata pa reduci structuralmente e gastonan di personal di mas aña. Gobierno di Aruba a presenta un plan den cual e gastonan di personal lo baha na 2018. E plan aki ta mustra tambe economizacion den e gastonan di personal pa 2019 y e añanan posterior. CAft kier a hala Gobierno su atencion riba e echo cu mester logra e ambicionnan den e plan aki minimalmente. Medida structural ta necesario. Cu interes CAft a tuma nota tambe di e intencion di Gobierno di reforma e sistema fiscal, cu ta masha anticua.

 

CAft ta enfatisa cu ta di esencial importancia pa prome cu fin di e aña aki Gobierno de Aruba y Conseho di Ministro di Reino logra yega na un acuerdo tocante un cuadro legal di supervision for di 2019. Esaki ta necesario pa CAft pa por emiti un conseho tocante e presupuesto aproba. Te awor Aruba a aplica un norma presupuestario pa 2019 di -0,5% di e PIB y a uza esaki den e evaluacion di CAft di e proyecto di presupuesto. Ademas di e conclusionnan ya menciona, CAft ta pidi pa fiha tambe un cuadro di mas aña pa 2020 y 2021 y pa ahusta e pronosticonan fiscal den e proyecto di presupuesto na e spectativa nan real a base di e realizacion di e aña aki.

 

Pa loke ta e bishita di CAft pa Aruba e biaha aki, tabata e prome bishita di Señora Hellen van der Wal y Señor Henk Kamp como miembro di CAft.

Señora Van der Wal ta miembro di CAft postula pa Aruba y Señor Kamp postula pa Hulanda. Tur dos a tuma asiento den CAft entrante dia prome di Augustus 2018, cu Raymond Gradus como presidente. Manera ta usual durante e bishitanan di Colegio na Aruba a hiba combersacion cu Gobernador, Ministro di Finanzas, Asunto Economico y Cultura, Conseho di Ministro y e Comision di Finanzas, Asunto Economico y Organisacion Gubernamental di Parlamento. Tambe CAft a bishita Banco Central di Aruba.

 

 

 

- Advertisement -

DUNA COMENTARIO

Please enter your comment!
Please enter your name here