Home Parlamento Edgard Vrolijk di MEP cu e plan pa tur Departamento di gobierno...

Edgard Vrolijk di MEP cu e plan pa tur Departamento di gobierno y gobernantenan traha conforme ley y regla

111
0
SHARE
- Advertisement -

ORANJESTAD (AAN): Diaranzon mainta durante conferencia di prensa di Fraccion di MEP, e miembro Edgard Vrolijk a mustra cu pa hopi aña, y sigur hopi gobernacion a bin y bay y tur tabata priminti di lo percura pa tin bon gobernacion, transparencia y integridad.

Pero na final di dia awe pueblo ta e unico heredero di tur e promesanan aki, manipulacion y mal uso di poder pa corumpi procesonan pa gana voto of pa previligia famia, amigonan of sponsornan. Ainda awendia pueblo completo ta victima di esaki unda cu nos debe ta actualmente na 90% di nos GDP, pues di cada Florin 90 cen ta bay pa paga debe.

No a yega akinan pa casualidad pero netamente pa falta di control di parlamento. Tambe e sistema di haci politica unda cu populismo a crea espacio pa hopi mal uso di poder y cu a haci hopi daño na e pais aki.

Con ta haci pa garantisa bon gobernacion, transparencia y integridad?

Desde 1 di oktober 2018 Aruba conoce un departamento di Integridad. Un departamento  cu tin como tarea pa percura pa tur departamento di gobierno pero tambe gobernantenan traha conforme ley y regla.

E departamento aki ta hopi importante pa percura pa tur ciudadano den e pais aki nan derechonan ta ser respeta y garantisa y cu tur proceso ta cana igual pa cada ciudadano den e pais aki. Y sigur tambe e departamento aki tin e tarea pa controla cu cada gobernante ta traha den margen di ley p’asina por garantisa cu cada proceso cu gobierno encamina no tin espacio pa previlegio.

Un ehempel pa pueblo compronde ta cu si mi persona como parlamentario haci entrega di mi peticion pa bouwvergunning mi mester cana e caminda manera cada ciudadano, No por tin previliegio pa esaki. Otro ehempel cu como empleado publico bo no por tuma ningun regalo pa gradicimento debi cu esaki ta ser considera omkoperij.

Como minister tampoco no por tuma ningun regalo (awendia conoci como donacion) for di ningun hende pasobra reglanan tambe ta conta pe como sirbidor di pueblo.

Institucion di departamento di Integridad:

E departamento aki ta conoce un persona na cabes den persona di señora Amalin Flanegin, cu a ser scogi pa un comision cu tabata consisti di PG, VDA, CAD y DRH, p’asina garantisa un proceso unda cu politica no ta hunga un rol y cu ta garantisa tambe cu e departamento aki lo traha independientemente di gobierno unda cu señora Flanegin awo tin e tarea pa busca personal y tambe edificio etc pa por set up e departamento y pa por cuminsa funciona.

Cu e departamento aki sigur nos por garantisa cu practicanan di pasado cu tereno, destaho publico, practicanan cu permiso unda hasta un Minister Paul Croes a cay cera ta ser impedi.

Abo como un bon ambtenaar por haci denuncia contra esnan cu ta haci mal uso di nan posicion pa previlegia of tuma placa pa servicio cu cada ken tin derecho riba dje pero ta us’e pa a cambio di placa apresura of previlegia esun cu a paga. Por haci denuncia y sigur e departamento aki cu ta uno independiente ta percura pa proteccion di esun cu a haci e denuncia y su identidad keda anonimo. Y e departamento aki ta haci su investigacion independiente di gobierno y hunto cu instancianan hudicial.

Dia 17 oktober e departamento di Integridad lo percura pa e prome congreso caba pa e hoofd van dienstnan pasobra nan mester percura pa cada departamento bao nan traha na un manera transparente y integro.

Kico parlamento lo haci pa e departamento aki funciona debidamente?

Sigur den e proceso pa percura pa e departamento aki por hiba un bon control riba funcionamento di nos gobernantenan, nos tin di percura pa tin leynan cu nos gobernantenan tin di tene na nan y ta haci cu e departamento por controla mas facil. Tres ley hopi importante ta esun di destaho publico, control financiero di partidonan politico y politiconan, ley di screening/integridad di ministernan y minister plenipotenciario. E ley di destaho publico lo ser trata muy pronto y prome cu fin di aña lo trata tambe e ley di control financiero di partidonan politico y politiconan. Hopi importante pasobra den e ley ultimo aki cada partido politico y politico tin un registracion ta kendenan ta esnan cu ta haci donacionnan na partido y candidato, y sigur e ta bay man den man cu e ley di destaho publico. Pa hopi aña nos tin un mal practica di kendenan ta gana destaho publico y esaki cada ken mester tin e mesun oportunidad di por gana un destaho publico y asina nos por garantisa pueblo tambe cu placa di pueblo ta ser bon usa y tambe percura pa proyectonan ta cana e caminda corecto y tur hende sa tambe ken ta responsabel.

Vrolijk a splica cu e  ta spera tambe cu prome cu fin di aña e ley di screening/integridad di ministernan y minister plenipotencario por keda trata of pa otro aña pasobra ta hopi importante pa cada minister declara tur aña kico e tin, pasobra bo no por drenta awe cu practicamente nada y basa riba salario ta imposibel cu, solamente si den e proceso bo gana un Lotto, bo por caba na grandi manera ta e mal costumber cu nos a conoce riba e isla aki cu a haci hopi daño na e pais y no mag pasa nunca mas.

Pa termina el a bisa cu den parlamento nan ta trahando duro pa cumpli cu pueblo pa garantisa cu tin un bon gobernacion, transparencia y integridad. Y Vrolijk ta spera cu den oposicion nan por cuminsa pensa mescos cune y ta spera cu nan tambe apoya e leynan aki, pa percura pa sigur locual e isla a conoce e ultimo 8 añan no por pasa mas.

- Advertisement -

DUNA COMENTARIO

Please enter your comment!
Please enter your name here