Home Editorial Editorial: Crisis politico ta exigi madurez politico nacional

Editorial: Crisis politico ta exigi madurez politico nacional

34
0
SHARE
- Advertisement -

      Ningun hende kier entrega mas placa cu ta necesario. Tin momento cu prioridad pa garantisa futuro ta haci necesario pa ciudadanonan evita culminacion di un desastre politico y yuda crea un futuro nobo.

Pa pueblo di Aruba por realisa pakico medida di austeridad ta necesario cu urgencia na Aruba, pueblo mester ta debidamente informa na un manera honesto cu splicacion amplio riba e desaroyo cu a conduci na un crisis.

DIARIO como e matutino cu a nace como instrumento di bienestar di e pais cu tabata acepta su futuro autonomo den Reino, tin e deber di entrega informacion corecto y manera proba pa detayenan oficial na Aruba actualmente. Aruba no tin tempo mas pa aventura pero mester di madurez politico nacional pa lucha pa su futuro.

Aruba casi a perde autonomia financiero na 2018 ora areglonan den Reino pa sostene un futuro sigur na Aruba, a duna e Gobierno nobo di Aruba oportunidad pa coregi e rumbo cu Aruba tabata aden.

Informacion sosteni pa documentonan ta mustra cu e pais no a ricibi guia na un forma honesto durante ultimo añanan, pero den demasiado caso a informa Aruba na un manera incorecto.

E instancia oficial cu ta e instrumento pa Parlamento por haci uzo di su derecho di vigila bienestar financiero pa Aruba, no ta laga luga na duda den su presentacion di e cuenta anual di 2016.

DIARIO ta cita: “Algemene Rekenkamer ta keda preocupa pa e situacion financiero di e pais. E preocupacion aki ta basa riba tres elemento crucial riba cual e investigacion a ser conduci. Ta trata di e posicion di debe di e pais, gastonan di interes relaciona cu esaki y e gastonan di personal den servicio di e pais. Algemene Rekenkamer ta conclui cu ainda tin un caminda pa cana prome cu realmente por papia di situacion financiero sostenibel di Gobierno.”

Mester nota cu Algemene Rekenkamer Aruba ta e organo mas halto di control di e pais y ta politicamente completamente independiente.

DIARIO den su empeño pa coregi informacion incorecto cu a alcansa pueblo ta publica e situacion cu realmente a desaroya su mes na Aruba, cu a ser poni na riesgonan grandi cu e acuerdo cu a firma cu Venezuela añanan atras, ora e situacion financiero y economico tabata a punto di rementa.

Un di e resultadonan tabata cu e presupuesto cu e gobierno nobo a ricibi pa 2018 di gobierno anterior, tabata completamente for di linea di e situacion catastrofico cu Aruba tabata aden riba tereno financiero y economico.

Na e momentonan aki turismo, cu mester a ser ahusta cu rapidez debi na e caida di mercado Venezolano, ta e unico recurso di Aruba cu no tin garantia cu e refineria lo bira realidad. E peliger cu e refineria lo no a conoce reapertura na 2018 manera mundo a adverti, nunca a ser admiti dor di gobierno anterior cu a mantene e totalidad di e acuerdo secreto hasta pa Parlamento.

Pakico mester a bin cu un proyecto grandi na 2014 ora ya catastrofe financiero a bati na porta, tabata desconoci pa Aruba cu a ricibi informacion incorecto riba e proyecto refineria cu awe ta otro problema serio.

E situacion financiero real ta sumamente delicado y mester di maneho politico honesto pa no causa desaster pa autonomia di Aruba.

DIARIO lo sigui informa Aruba y lo sigui duna splicacion corecto pa hunto por cana riba e caminda di solucion y bienestar pa Aruba.

- Advertisement -

DUNA COMENTARIO

Please enter your comment!
Please enter your name here