Home Editorial Editorial:  E fabula peligroso di cannabis

Editorial:  E fabula peligroso di cannabis

60
0
SHARE
- Advertisement -

Un enemigo di e balansa di loke ta bon y loke ta malo, sigur ta e miedo pa bay contra loke un grupo cu ta domina den comunidad ta predica. Responsabilidad ta ser poni un banda pa sostene storianan cu ta carece di un base realistico y ta mas bien producto di e deseo of interes personal.

E fabula peligroso di cannabis, marihuana y hash, a haya acogida cu crecemento di e grupo cu kier scapa for di problemanan diario.

Cu hende kier huy de bes en cuando for di su realidad, no ta nada straño. Vacacion ta un posibilidad pa relaha y bolbe na e preocupacion di tur dia. Naturalesa semper a brinda oportunidad pa kibra cu rutina y gosa di aspectonan placentero di bida.

Historia di humanidad ta mustra cu semper tabatin otro formanan di escape. Alcohol ta conoci como un medio pa bira burachi den entre otro e mundo occidental. Biña, cerbes, rom, cognac, cada uno ta presente na e bida social di un pais occidental pa encuentronan social pero tambe pa decadencia total. Bacanal ta ilustra e perdida di nocion y cay den un falta total di responsabilidad y transformacion di personalidad.

Conkista di teritorio tambe ta parti di historia humano. Hende kier a amplia su ambiente pa busca mas rikesa y propiedad. Asina culturanan indigena di paisnan aleha a cuminsa plama na paisnan occidental. Yerba oriental a yega occidente.

Na Siglo 20 desaroyonan mundial a trece culturanan mas cerca otro. Interaccion humano tabatin su parti positivo y tambe negativo pa e generacionnan despues di guera, cu kier a trece cambio.

Lidernan nobo a nace pafo di e ambiente di gobernacion y sosteni na avancenan tecnologico artistanan a bira e modelonan nobo pa e epoca “moderno” cu a deshaci di normanan y balornan tradicional. Ta den e temporada cu musica electronico y agrupacionnan famoso a yena stadionnan cu fanaticonan histerico en busca di escape di realidad diario, cu droga a subi escenario.

Si analisa cifranan di comunidad moderno, por nota cuanto placa hende ta inverti pa lubida su berdad. Musica, makeup, recreo, ambiente social, a cambia comunidad completamente.

E cantidad di hende cu no ta satisfecho cu nan mes of tin problema pa acepta nan identidad propio, kier huy di nan berdad. Exigencianan pa participa den sociedad of desaroya den bida a base di estudio, ta crea presion constante.

Trafico aereo, maritimo, na tera, ta pone e hende move di un punto pa otro. Bida familiar a cambia. Amistad a cambia. Labor a cambia. Hende ta sinti su mes forsa pa cambia y un di e formanan mas facil pa deshaci di e tension cu e ta produci ta, abusa di alcohol, droga den ambientenan cu ta aporta na huida di realidad.

Pa hopi tempo autoridad a asumi su responsabilidad total pa frena abuso di droga. Cu progreso di e negoshi di droga, paisnan a cuminsa legalisa e porta principal pa abuso di droga, cu ta cannabis, marihuana.

Un fabula a ser crea di cannabis como medio curativo pa tur sorto di enfermedad hasta di malesanan cu marihuana mes ta crea.

E yerba mester calma dolor di un brasa of pia si e ta calma funcionamento di nos mente y saca nos for di realidad diario. Droga ta parti di remedi controla pa alivia dolor. Pero ta tene cuenta cu e uzo y e porcentahe di droga cu ta uza.

Pleister di morfina ta conoci pa hopi tempo. Esey no ta nifica cu mester duna tur hende morfina.

Actualmente dirigentenan di pueblo tin un responsabilidad grandi den mundo di cambio di personalidad. Te ki grado e consumo di droga ta afecta e violencia y agresion actual?

DIARIO ta contra sosten na e fabula di cannabis y ta pidi tur dirigente riba tur tereno asumi nan responsabilidad riba e tereno tan importante pa futuro di Aruba, cu nunca a sostene e entrada clandestino di trafico den droga cu a destrui balor importante di e pais.

 

 

 

 

- Advertisement -

DUNA COMENTARIO

Please enter your comment!
Please enter your name here