Home Editorial Editorial: Venezuela y e morto di dignidad humano

Editorial: Venezuela y e morto di dignidad humano

178
0
SHARE
- Advertisement -

“Amo, sueño, canto, rio…” Palabranan di e cancion Alma Llanera, cu tabata ser considera generalmente como e segundo himno di Venezuela. E cancion di un pueblo, cu Creador a regala tur loke ta necesario pa por biba feliz. Awe no a resta nada di e felicidad apasiona di un pueblo cu ta victima di loke mundo ta yama e pio crisis humanitario cu Latino America a conoce.

E situacion ta di tal magnitud cu paisnan manera Aruba mester a evita cu nan ta crea un caya sin salida. Pero e momento ta yega pa no unicamente Aruba pero henter mundo duna atencion na un fenomeno cu ta manifesta su mes na paisnan caminda dictadura, guera di poder, di ideologia of religioso ta pone ruman mata ruman y ta destrui un nacion.

Awe rond mundo personanan cu un dia tabata refugiado y cu ayudo di famia of amigonan a logra bandona nan pais y cuminsa un bida nobo, lo ta bolbe den tempo pa corda kico a pasa cu nan pais.

Un hende cu nunca a bandona su cas y nunca mester a laga atras tur loke el a traha pe den su bida, nunca por comprende e berdad di un refugiado. Talbes esey ta motibo cu instancianan oficial nunca a haya un solucion eficaz pa e problema y refugiadonan mester a entrega nan comunidad, nan cultura, nan suela y ambiente y sigur nan dignidad humano pa drenta otro pais como hende cu a haya limosna.

Den historia di tur pais ta topa cu refugiadonan di crisis humanitario y awe instancianan internacional mester ocupa nan mes cu buskeda di un solucion pa por actua na momento cu dictadura of guera cuminsa pone gruponan grandi bandona nan pais.

Mundo ta papia di democracia. Ki contenido democracia tin realmente si mundo no ta capaz di lanta para y defende of sikiera brinda auxilio berdadero na victimanan di abuso di democracia?

Ta berdad cu democracia ta duna pueblo e derecho pa dicidi con su presente y futuro lo ta. Ta berdad tambe cu ni hende ni pueblo ta perfecto y por tin e tendencia di bay tras di promesanan falso.

Awe Venezuela den region Latino Americano y cantidad di pais na otro partinan di mundo, ta papia di buskeda di un solucion pa por sostene e creencia universal di dignidad di hende.

E potretnan di Venezolanonan cu ta ser ataca violentamente ta pone curason di un hende cu un crenchi di sentimento haci dolor. E imagennan di refugiadonan cu nan kier a kima pa deshaci di nan na Ecuador, e cadavernan den lamanan y oceannan ta exigi mundo haya un solucion pa e drama di hende.

Mester tin castigo pisa pa dictadornan y tur cu lentamente ta mata poblacion di un pais cu ta perde tur dignidad humano, ta perde derecho riba alimento, cuido medico y remedi pa asina supuesto lidernan por proclama nan mes un dios na mundo.

Si ta necesario, Nacionnan Uni mester papia cu paisnan grandi cu terenonan grandi cu ainda por ser desaroya, pa refugiadonan por establece nan mes y crea un porvenir nobo of spera e momento cu nan por bolbe nan pais di origen.

Mientras esaki no sosode, holocausto manera a conoce durante Segundo Guera mundial ta e berdad di mundo cu ta deshaci di e contenido y balor di democracia cu ta afirma e dignidad di hende y su nacion.

- Advertisement -

DUNA COMENTARIO

Please enter your comment!
Please enter your name here