Home General Famia di venezolanonan cu a fayece hoga ta denuncia retraso den traslado...

Famia di venezolanonan cu a fayece hoga ta denuncia retraso den traslado di curpanan

1965
0
SHARE
_Wilfredo Jesus Vilela Marrufo y Jhonny Perozo Bracho, ambos venezolano y victima di e tragedia cu a sosode Diasabra ultimo cerca di Santana di Cacho_
- Advertisement -

Nan a keha cu Gobierno Venezolano no a ofrece ayudo

ORANJESTAD  (AAN): Manera ta conoci,  repatria e curpa di un persona despues cu e ta fayece na un otro pais ta un asunto cu no ta sosode di un dia pa otro.

Imagina bo awor den e caso di e personanan cu ta fayece na Aruba pa motibo cu nan a purba drenta ilegal y durante cu nan a pone nan bida na peliger a resulta cu nan ta bin fayece hoga den lama.

E informacion cu DIARIO a haya for di Venezuela ta cu famia di Wilfredo Jesus Vilela Marrufo y Jhonny Perozo Bracho, ambos venezolano y victima di e tragedia cu a sosode Diasabra ultimo cerca di Santana di Cacho, nan curpanan a wordo identifica dialuna.

Awor tur dos famia ta desespera buscando e manera pa por traslada e curpa di nan sernan keri.

Den un articulo publica den “El Universal” di Venezuela, e ruman muher di Wilfredo, Leyva Coromoto Vilela Marrufo, el a duna di conoce cu e tin un aña ilegal aki na Aruba trahando como cria pa purba di mantene su famia cu ta na Punto Fijo.

El a conta cu diasabra tabata e dia su cumpleaño y e tabata den espera di e yegada di su ruman homber, kende ya caba a traha na Aruba ilegalmente den e tereno di construccion. Su ruman a keda un promedio di 6 luna te ora cu a wordo deporta dos siman pasa.

Wilfredo tabata tin 39 aña di edad. E tabata taxista. Pero tog, debi na e situacion na Punto Fijo, el a dicidi di bin Aruba bek den un boto, mescos cu e prome biaha.

E ultimo biaha aki, el a paga $250 pa wordo transporta. Pero e biaha aki e no a logra su meta.

Fuentenan cercano a bisa “El Universal”, cu e boto a haya un fayo den e motor y pesey e capitan a pidi e tripulantenan pa bay den lama. Wilfredo no tabata sa landa y el a subi sin “lifesaver” y e tabata confia cu lo a baha nan mas cerca di e costa.

El a laga tres yiu, dos mucha homber di 16 y 9 aña y un mucha muher di 7 aña.

Segun e ruman muher aki na Aruba, pa traslada e cadaver mester paga 4580 florin y e no tin ni un cen, ni pa su pasashi pa bay bek su pais.

E otro caso ta e situacion di e familiarnan di Jhonny Perozo Bracho (24 aña), kende tambe a fayece den e tragedia.

Perozo Bracho tabata casa y a laga dos yiu (un mucha muher di 3 aña y un baby di un aña). Tambe tabata su di dos biaha intentando drenta Aruba di manera ilegal. El a traha den construccion mas di un aña te ora cu el a wordo deporta un aña y mey pasa.

E biaha aki su meta di bin Aruba tabata pa haya cen pa caba di construi su cas y haya placa pa Pasco pa su famia cu ta biba na e peninsula di Paraguaná.

Su ruman a bin Aruba buscando e manera di haya e placa (4.630 florin) cu e funeraria ta cobra pa entrega e cadaver.

El a laga sa cu algun venezolano y organizacion den e comunidad a duna algo di ayudo. Pero na otro banda a lamenta cu e Embahada di Venezuela na Aruba ni e gobierno venezolano a ofrece e famianan ayudo den e situacion aki.

UPDATE:

Segun ultimo informe cu DIARIO a haya ta cu e mesun ruman aki, Perozo Bracho, a duna di conoce diahuebs cu desde cu e autoridadnan venezolano a interveni den loke ta e traslado di e curpanan, a conoce un tardanza.

El a denuncia esaki cerca e gobernador di Estado Falcon y cerca e alcalde di e municipio Los Taques. Desde diasabra, a bisa, nan a haya e sosten di e Fundacion Venearuba pa asina yuda colecta e placa pa paga e funeraria.

A enfatiza cu te cu diahuebs, e gobierno di Venezuela no a ni worry, pero cu ora cu a reacciona tabata pa stop e envio di e curpanan via barco, pasobra aparentemente e gobierno venezolano a laga sa cu nan tin mas alcance cu e maneho di e permisonan. Pero te cu diahuebs merdia no tabata tin ningun avance, Perozo a indica na El Universal.

_ Jesus Rafael Gomez (32 aña) ta desapareci _

Den e caso lamentable aki, tabata tin un total di persona cu a subi e boto. Ademas di e dos personanan cu a fayece, tin un mas cu ta desapareci (Jesus Rafael Gomez di 32 aña. Tambe tin esnan cu a wordo deteni y varios otro cu lo ta scondi purbando di busca manera di por sobrebibi na e isla.

Potretnan: El Universal

 

- Advertisement -

DUNA COMENTARIO

Please enter your comment!
Please enter your name here