Home Cultura Grupo di Betico lo ta 3 ora ariba escenario durante nan celebracion...

Grupo di Betico lo ta 3 ora ariba escenario durante nan celebracion di 50 aña

675
0
SHARE
- Advertisement -

“Venezuela Recording Strings Ensemble” orkesta invita 

ORANJESTAD (AAN): Maikito Croes ta un di e miembronan original di Grupo di Betico, cual a wordo lanta na aña 1968 y cu awor ta bay celebra 50 aña di existencia.

Nan lo ta celebrando e evento historico aki diaranzon 12 di December cu un gala na Renaissance Convention Center.

“E ta bay bira un anochi spectacular. Un anochi cu den mi experiencia musical nunca mi a mira algo di e indole aki. E caliber di e musica ta bira un caliber di musica hopi interesante y muy en particular e echo cu nos ta bay duna tur locual nos tin como Grupo di Betico pa ofrece Aruba henter un celebracion cu nan merece na e ocasion di 50 aña di Grupo di Betico”, a expresa.

VARIOS ARTISTA INVITA

Pa loke ta e concierto, Maikito Croes a indica cu esaki ta bay tin un duracion di tres ora cu Grupo di Betico lo ta ariba escenario. E lo ta un combinacion hopi interesante di Aruba su floklore y di Aruba su musica.

For di final di aña pasa a bin cu e idea pa e aña aki invita varios cantante hoben pa bin canta cu Grupo Betico. Esaki ta un proyecto interesante bao guia di Gos Oduber. Ta trata di artistanan cu ya caba a canta cu e grupo den festivalnan local manera Jeanedy Semeleer, Terrie Phillips, Rocco Franken, y tambe Edjean Semeleer.

Ta drentando studio tambe cu Jeon y cu Jerrino Bass, Landa Henriquez y asina cu tempo permiti lo sigui graba cu mas artista.

Lo tin invitadonan special manera Izaline Calister cu lo subi escenario pa canta “Bendiciona”.

Pa loke ta trata e espectaculo musical aki, Maikito Croes a sigui bisa cu pa prome biaha un grupo folklorico di Aruba ta bay tin un concierto cu un backup orkestral. Lo acompaña Grupo di Betico e “Venezuela Recording Strings Ensemble” cu 19 musico. Nan ta un di e orkestanan mas solicita na Venezuela pa grabacionnan pa diferente ocasion. Nan ta bin cu nan tecnico cu a gana varios Grammy Awards pa su trabao cu orkestanan.

Nan ta bay tey na Aruba acompañando Grupo di Betico pa e gran Concierto di Oro. “Esaki lo bira algo hamas bisto akinan na Aruba y nos sa cu pueblo di Aruba lo sa di aprecia e gran celebracion aki tambe cu nos”, Croes a manifesta.

 

- Advertisement -

DUNA COMENTARIO

Please enter your comment!
Please enter your name here