Psicologo Diana Wever- Salcedo
ORANJESTAD (AAN): Cual ta e momento indica pa bati na porta di un psicologo of un experto pa motibo di stress? Riba esaki Psicologo Diana Wever- Salcedo, kende a papia riba e tema dialuna mainta den conferencia di prensa semanal di Departamento di Salud, a bisa cu cada caso ta diferente.
E señalnan por bin for di e famianan, di e coleganan, hefenan, pero e por bin di e curpa tambe. Ta bisa e personanan pa haci test pa por detecta cosnan organico, kiermen si tin di haber cu un malesa manera cancer of otro problema, a bisa.
Pero kico cu por ta hopi biaha e por ta un acumulacion di hopi stress. Si bo ta ripara cu bo no ta drumiendo bon, bo no ta comiendo bon of cu bo no ta sinti bo mes bon (desmotivacion, sinti tristo, ansha, etc), puntra bo sernan keri asina bo ripara cu bo ta cambiando.
E proceso du recuperacion ta depende di cada persona. Ta depende di e terapia cu e persona ta haya. Tur persona tin un situacion diferente. Por bisa cu ora nan yega cerca un psicologo nan ta yega cu mini tsunaminan y cada gota ta un gota di mas, e psicologo a splica.
Un persona cu perde un ser keri, por ehemplo, nan ta bay den proceso di duelo. Si nan no proces’e adecuadamente ta tuma tempo, pero un bez cu nan haci esaki por ripara cu e situacion por wordo alivia, a splica.
Por ta, ta trata di un persona cu mester di hermentnan pa maneha e situacion pa un tempo. Por ta un sesion cu e hefe, colega y su persona ya caba ta alivia hopi cos. Of cu e famia of e persona cu ta treciendo un situacion di tension.
Sali for di stress ta depende di e compromiso di e persona. E por dura algun luna of un aña pa recupera for di dje. E psicologo no ta haci magia. E persona mester ta hopi honesto y sigui su tratamento, Diana Wever-Salcedo a enfatiza.
E consecuencianan di keda biba cu stress por ta falta di atencion, e persona ta bira irita y despues e ta sigui bira peor. Esaki no solamente ta afecta bo persona pero esnan rond di bo manera bo yiunan of bo casa.
“Mas stress acumula, menos nan por focus”. Esaki ta sosode cu famia, pareha, trabao, etc.
E ta bira un circulo vicioso cu ta dificil pa sali afo, e psicologo a indica.
Finalmente, el a menciona cu hopi compania a bira conciente di e importancia di e salud mental di nan trahadornan. E departamentonan di recurso humano ta pidiendo ayudo. Nan ta reconoce e balor di nan empleadonan, pero ora constata cu algo no ta bon ta algo cu mester atende cune.
E empleadonan mes tambe ta pidi ayudo na e dunador di trabao, a splica.
