Home Salud Investigacion a mustra cu na Aruba tin 32 gang y 1500 mucha...

Investigacion a mustra cu na Aruba tin 32 gang y 1500 mucha cu ta miembro

1872
0
SHARE
- Advertisement -

Mal funcionamento den famia ta creando un circulo vicioso

ORANJESTAD (AAN):  Dicon tin hopi hoben ta hayando problema di salud mental? Esaki ta un pregunta cu e hefe di Departamento Social Sikiatrico, Rafael Lopez, a contesta durante un entrevista hopi interesante riba e tema di Salud Mental den e programa “Entrevista di Dia” di e radioemisora Hits 100 FM.

Den colaboracion cu DIARIO ta comparti e informacion valioso aki unda Rafal Lopez a laga sa cu el a haci un investigacion algun tempo pasa ora cu el a saca su Master Degree y riba e pregunta anterior el a duna di conoce cu tin motibonan diverso cu ta conduci na e problema di salud mental cerca e hobennan, pero comunicacion ta hunga un rol importante.

“Si mi wak den nos onderzoek di e estado emocional di nos hobennan cu nos a haci un par di aña atras, e ta bin dilanti cu e muchanan aki no ta conforme cu loke nan ta of cu loke nan ta haciendo. Eynan ta bin e comunicacion, cu no tin comunicacion. E comunicacion den famia”, Lopez a remarca.

E comunicacion estrecho cu tabata tin antes no tey. “Aworaki hopi di nos ta carga cu nos mesun problemanan y na momento cu un hende cuminza combersa cu bo, kier bisa bo kico e tin, ya nos a cuminza bisa caba kico nos tin. Loke nos ta pasando aden, na lugar di scucha e otro persona”.

Un di e problemanan grandi den nos comunidad ta cu nos no ta scucha otro, a subraya.

Den e investigacion cu Rafael Lopez a haci tocante “gang” por wak cu hopi di e muchanan aki na “self-esteem” ta hopi abao door cu nan no tin e comunicacion, e relacion cu nan mayornan. Nan no tin e guia den famia, e ora loke nan ta haci ta bay busk’e den un otro forma. Esey ta pone cu e muchanan aki ta bay den un otro caminda cu e no tabata kier di bay, a agrega.

E muchanan a laga sa den e investigacion cu nan ta haciendo cosnan cu eigenlijk nan no ta gusta haci, pero nan ta hacie pa nan pertenece na e grupo cu nan ta den dje. Ademas ta cosnan cu ta hisa nan adrenalina.

Door cu nan no ta haya atencion cerca nan famia, nan ta bay busca e atencion pafo, Lopez a duna di conoce.

For di e investigacion aki a sali afo cu na Aruba tin na e momento ey 32 gang y 1500 mucha perteneciendo na e gangnan aki. Na Corsow, a indica, tin 101 gang, pero si mira e diferencia den e poblacion, por bisa cu ta casi mescos cu Aruba.

Na Aruba por papia di diferente tipo di gang. Tin gang cu ta hopi inofensivo. Muchanan cu den weekend ta horta na un chines pa haya un tiki cen of nan ta bende nan marihuana. Pero tambe tin gangnan cu ta wordo considera organizacionnan criminal. Gangnan cu ta haci cosnan, negoshinan grandi y nan ta hopi bon structura.

E investigacion aki a dura 5 aña y a tuma basta tempo pa Rafael Lopez por a drenta e gang pa e por haci e onderzoek for di paden di e gang. Por a wak hopi problema entre famia y hopi link den loke ta e uso di droga, e desaroyo di maleza mental cu e falta di comunicacion y e mal funcionamento di un famia.

Tin mayornan cu te hasta e reconoce cu nan mes a inculca den nan yiunan e cultura di gang, pasobra mester a haci nan “duro”. Pero nan no ta prepara e yiu pa enfrenta e mundo, e problemanan y pa soluciona esakinan cu man duro.

“Eigenlijk no ta hincando e mucha den un situacion cu bo no mester a hinke aden. E ora bo ta bay haya un circulo vicioso caminda e mucha ora e haya su yiu e tambe ta bay lante mesun cos, pasobra esey ta e educacion cu el a conoce”, e hefe di DSP a duna di conoce.

- Advertisement -

DUNA COMENTARIO

Please enter your comment!
Please enter your name here