ORANJESTAD (AAN): Capitulo Magnificat-Brasil, ‘Maria, Strea di Speransa’, hunto cu pastoor di parokia, pastoor Wuilder, por mira bek riba e exitoso Magnificat Lunch recien teni na Marriott Resort Aruba.
E parti principal di e comemento di Magnificat ta dunamento di testimonio di Dios su obra maraviyoso den bida di e orador despues di a ricibi e manifestacion di Spirito Santo durante un Seminario Bida den Spirito.
E biaha aki a toca Cordilia Fun, coordinador di dicho organisacion, pa duna su testimonio. El a conta na un manera excelente con su simpel oracion: “Señor, mi kier wak Bo misa yen di hende. Señor, mi kier sirbi Bo”, a habri e caminda pa e descubri e plan di Dios den su bida. El a capta atencion di un y tur cu su testimonio con Dios a transforma su bida, y a yen’e cu un zelo pa salba almanan. Talbes e caminda tabata doloroso. ma semper el a keda confia firme den Dios su Palabra: cu tur cos ta contribui na bienestar di esnan cu ta stima Dios, esta esnan cu El a yama di acuerdo cu su proposito (Rom 8:28)
Su testimonio sigur ta un inspiracion pa esnan cu tabata presente pa sirbi Señor cu mas fervor.
Magnificat, un ministerio pa hende muhe ta un organisacion sin ningun proposito lucrativo ta depende riba contribucion di sponsors y recaudacion di fondo.
Un danki sincero di curason ta bay na tur esnan cu a yuda na un of otro manera pa realisa e funcion importante aki di Magnificat. Boso apoyo a surpasa tur nos expectativa.
