ORANJESTAD (AAN): Awe un biaha mas DIARIO kier a ripiti e potret aki, pa asina ilustra un famia hopi respeta na Aruba, caminda delaster un miembro di famia a bira un profesional den mundo di cuido di diente y di medicina.
Dentista Marcel Ho-Kang-You a observa e siman aki, cu 42 aña pasa el a cuminza eherce su funcion como Dentista. Pues 42 aña pasa el a habri su oficina na Zuidstraat 1 na Playa.
Keto bay e ta trahando! Ningun momento Dentista Ho-Kang-You a bay cu pensiun. E ta laborando ainda cu AZV y Aseguronan priva. Y su clientenan fiel semper a sa di aprecia Dentista Ho-Kang-You pa su habilidad, conocemento, y carisma.
Ademas di esaki, Dentista Ho-Kang-You ta feliz pa mira cu su yiunan tambe a move bay den e direccion di cuido medico y cuido dental.
Su yiu muher Marielle Ho-Kang-You tambe a bira Dentista, y ta trahando awor hunto cu su tata den e oficina na Zuidstraat 1.
Su yiu muher Melanie Ho-Kang-You a sigui estudio, y ta Docter di Cas aworaki laborando na Hulanda.
Den fin di siman cu a pasa, e yiu homber Marcel Ho-Kang-You a finaliza e Huisartsenopleiding, y ta cuminza traha na Aruba awor como Docter di Cas.
Sigur un felicitacion di DIARIO na famia Ho-Kang-You cu e logro aki.
Riba e potret aki por mira d.r.p.d. Veronica Olarte (pareha di e recien gradua Dr. Marcel Ho-Kang-You), Sheila van Veen, (directeur di APFA y nan ruman), Dr. Marielle Ho-Kang-You (dentista), Marcel Ho-Kang-You (dentista), Dr. Marcel Ho-Kang-You (Docter nobo), señora mama Beatrix Ho-Kang-You, Dr. Melanie Ho-Kang-You, nieto Dimitri, y e nanny Olga.
