ORANJESTAD (AAN) — Gobierno di Aruba, no obstante tur e retonan financiero cu tin, a lanza Diahuebs mainta, durante un conferencia di prensa extraordinario, un “App di informacion” na cual pueblo y prensa mes, lo tin acceso directo na dje, y ta gratuito.
Pa splica e meta y con esaki ta funciona, Prome Minister mr. Evelyn Wever-Croes a elabora al respecto.
E dignatario a señala cu esaki ta e lanzamento di un proyecto innovative y hopi importante. Ta trata aki di un app, cu por download na telefon, y atravez di dje por haya tur informacion di gobierno. Tambe e ta accesible via App Store y Google Play.
Atravez di e app aki por haya informacion cu ta sali den prensa, eventonan, etc., y por keda den contacto estrecho y directo cu gobierno.
E dignatario a expresa cu telefon celular no ta un luho mas awendia y su uso regular ta normal caba.
CORANT DIGITAL:
E mandatario a haci enfasis cu gobierno di Aruba ta publica su propio corant digital yama “Isla online” cu ta wordo edita tur atardi entre 5 pa 6 or. Den e corant aki por haya tur e informacion mas reciente di gobierno, y cu esaki kier haci mas cerca e comunicacion cu comunidad y mustra cu pueblo mester ta bon informa, pasobra un pueblo bon informa por tuma bon decisionnan pa su futuro.
Ademas, gobierno kier elimina e fenomeno cu tin di “fake news” y asina comparti e informacion corecto y veridico cu nos comunidad.
E app aki ta completamente gratis, e dignatario a subraya. El a agrega cu pa prensa tambe e app aki ta util pa haya su referencianan y naturalmente ta enfatiza e importancia cu innovacion tin pa gobernacion, cu no solamente ta papia di dje, pero ta aplike.
Cu hopi orguyo y gradiciendo e ekipo cu a haci esaki posible, e mandatario a lanza e app aki den e conferencia di prensa aki, pa medio di un presentacion den video.
Via e app aki tambe por busca cada minister y comunica cune directamente, hacie pregunta y dune comentario.
