Ora a suspende miembro di Management Team
ORANJESTAD (AAN): Pa medio di un comunicado di prensa Serlimar S G ta indica cu Hunta di supervision di Serlimar despues di a haci un investigacion preliminario dia 7 di september 2018, a suspende 1 miembro di ‘Management Team’. Esaki pendiente un investigacion mas extenso.
E investigacion aki a conduci na e resultado cu ta indica cu actonan castigabel no a tuma lugar. Ademas e investigacion a conclui cu no tin motibo pa tuma pasonan adicional disciplinario.
Pa e motibo aki hunta di directiva di Serlimar a revoca inmediatamente e prohibicion di entrada como tambe suspension di e miembro di ‘Management Team’.
Hunta di supervision ta lamenta incoveniencianan cu esaki por a causa e miembro di management team, pero ta garantisa cu e proceso ta den cumplimento cu “Good Governance Procedures.
Serlimar S G ta spera di a informa comunidad debidamente ariba e resultado di e investigacion y ta garantisa comunidad di Aruba di ta para pa un organisacion transparente y integro.
