Entrevsta cu sra. Setty Baar:
ORANJESTAD (AAN) – Relaciona cu e Dia “Internacional di Garoti Blanco” Matutino DIARIO a entrevista señora Setty Baar, director di Fundacion FAVI, ken a trece dilanti datonan masha interesante.
Manera ta conoci e Dia Internacional di Garoti Blanco ta wordo celebra Dialuna 15 di October, y e fundacion a tene un dia di concientizacion Diabierna ultimo poniendo atencion riba e area di Linear Park, pa clausura un siman di actividad cu a tuma lugar.
IMPORTANCIA DI E GAROTI BLANCO:
“E garoti blanco cu strepi cora ta sumamente importante pa seguridad di e persona ciego, pero tambe pa esnan cu limitacion visual cu mester moviliza su mes den e bida diario”, sra. Setty Baar a pone acento den entrevista cu nos matutino.
Sra. Baar a menciona cu FAVI tin alrededor di 380 cliente registra pero esey no ta nifica cu esey ta tur cliente, pasobra tin cu no a registra y hasta cu nan no conoce.
Segun datonan di censo di aña 2010, na Aruba tin 3105 persona cu tin un of otro limitacion di bista, pues FAVI sa cu eyfo tin hopi persona cu ainda tin miedo di registra nan mes, pa laga sa cu nan tin e problema di bista, y e fundacion ta keda motiva tur persona concerni pa nan registra.
“ Registra no ta nifica cu nan mester participa den tur actividad di FAVI pero si e ta nifica cu nan por haya ayudo na e nivel cu nan tin mester”, sra. Baar a menciona.
El a indica cu un persona cu ta traha y tin limitacion visual, FAVI por yude na unda e ta haya dificultadnan, of un hende pensiona cu problema di bista cu ta na cas por ta e por haci diferente actividad, of muchanan cu ta na scol nan por haya nan aumento, nan material cu ta importante pa nan por haya mas educacion.
“Mi kier bisa cu e ayudo ta pa personanan di 0 aña te edad halto, y a base di loke e persona mester di dje segun di limitacion”, director di FAVI a indica.
E siste Braille ta esun cu ta wordo uza pa yuda e personanan invidente lesa y skirbi y awendia tin hopi di nan cu ta excelente den informatica.
Pues, e hecho cu un persona cu no tin vision, of tin limitacion, no ta nifica cu nada mas tin pa nan.
“Un di nos clientenan ta traha den sector publico siendo completamente ciego, y ta desaroya den su trabao manera cualkier otro trahador, naturalmente cu su adaptacionnan. No ta importante unda un persona ta traha pero si pa sa cu apesar di un limitacion di bista e por haya ayudo pa biba independiente, traha, y ta manera otro persona cu si tin vision” sra. Baar a subraya.
Sra. Baar a comenta cu tin mucha di scol cu ta hayando guia aworaki. FAVI tin dos maestro cu ta bay scolnan pa guia e muchanan.
“Aworaki, den scol regular nos tin dos mucha completamente ciego, nan tur den 6de klas y cu otro aña nan ta bayendo pa educacion avanza, cu ta haya guia di FAVI”, sra. Baar a menciona.
El a señala cu mayoria di e muchanan cu problema visual tin limitacion cu mester di un aparato cu ta aumenta e visibilidad pa nan por lesa mihor. Pero e ta un realidad cu nos tin na Aruba.
FACTORNAN CU TA HUNGA UN ROL:
Tin varios factor cu ta hunga un rol tanto den falta total di bista como den limitacion visual.
Sra. Baar a menciona algun malesa cu ta causa problema di bista manera: Glaucoma cu ta un malesa unda cu e presion di wowo ta subi, cual ta pone cu e ta haya presion riba e nervio di wowo, loke ta causa cu e bista por bay atras; Diabetes cu tambe por causa problema severo di bista; tin ademas malesanan hereditario manera rhinitis pigmentosa, glaucoma hereditario, catarata, entre otro diferente problemanan di bista cu ta wordo hereda.
Tin hende tambe cu a haya tumor den cerebro cu a causa problema di bista, pasobra e por a afecta e nervio di wowo, por ehemplo.
FONDONAN:
FAVI manera otro fundacionnan ta haya un subsidio general di gobierno, cu cual entrada nan tin cu draai completamente, tanto e parti di operacion como e servicio cu nan ta duna nan clientenan.
Sra. Baar a expresa cu naturalmente e subsidio no ta yega pa tur cos, y pesey nan ta tene accion di donacion tur aña, pa nan por usa e fondonan recauda hunto cu e subsidio pa asina aki, por keda brinda e servicio di FAVI.
NA CAMINDA PA 45 ANIVERSARIO:
Dia 21 di Februari 2019 FAVI lo celebra su di 45 aña di existencia.
