ORANJESTAD(AAN): Diasabra anochi, mientras cu polis ta haciendo control, a nota cu chauffeur di un Nissan Tiida color shinishi cu number A-5355, tabata drift, slide, y canta wiel di auto na un manera iresponsabel. Y e tabata haci esaki riba caminda publico!
E agentenan ta testigo, con dado momento e chauffeur di e Nissan no por a domina su vehiculo, y por poco e auto aki a causa un accidente. Tin hende cu ta kere cu ta ‘sports car’ nan ta coriendo, siendo ta un simple sedan.
E patruya di Polis tabata apenas dos auto tras di e Nissan Tiida, y nan a tuma accion di biaha! Nan a sende zwaailicht cu sirena, y a para e chauffeur iresponsabel aki di biaha. Nan a dun’e un bon scual pa loke el a caba di haci, unda por poco el a causa accident..
Diferente reaccion a drenta di automobilistanan cu ya no sa kico pa haci cu esnan iresponsable cu ta ‘drift’ cu nan auto riba caminda publico, specificamente rond di rotonde.
Algun tempo pasa a leak informe, cu Fiscal a duna OK pa ora cu haya un auto ta haciendo drifting y slide riba caminda, cu ta bay confisca e vehiculo.
Tambe a keda publica e suplica di algun habitante rond di area di rotonde, cu ta pidi pa DOW pone algun ‘plateau’ hopi chikito mes rond di rotondenan, pa asina descurasha autonan di slide intencionalmente estilo drift rond di nan.
E biaha aki, un automobilista a bin cu e sugerencia pa Cuerpo Policial instala security camera di high-resolution cu ta vigila rotondenan. Di e forma aki, Polis por haya sa mesora ki ora algun chabalito ta trece nan bida y di otro den peligro, door di slide riba rotonde.
E suplica ta bay pa usa camera cu ta di resolucion halto, pasobra esaki sigur lo bay yuda Polis lesa numbernan di auto pa asina por regla cuenta despues cu e doño.
Pesey mes por a lesa comentario, cu no ta tur hende a keda contento cu Polis a djis duna e chauffeur di e Nissan Tiida aki un simple ‘scual’ pa loke el a haci.
