Home Enseñanza Bon Informacion pa haci un escogencia di estudio ta cardinal

Bon Informacion pa haci un escogencia di estudio ta cardinal

23
0
SHARE
- Advertisement -

Ministro Besaril:

ORANJESTAD (AAN): Minister Plenipotenciario Guillfred Besaril a bishita tres school di educacion secundario na Aruba pa duna informacion na e alumnonan cu ta den voorexamen riba escogencia di estudio y tambe informacion si nan pensa pa scoge pa bay Hulanda pa estudio. E encuentronan aki a tuma lugar na Colegio Arubano San Nicolas, EPI y Colegio Arubano na Playa.

Na tur tres encuentro minister Besaril a enfatisa e importante di ta bon informa pa scoge ki estudio bo ta bay sigui despues cu bo a caba Colegio of EPI. ‘Como minister mi ta convenci cu e hoben mester ta bon informa riba tur opcion cu tin pa sigui un studio avansa. Na momento cu bo tuma e decision pa sigui un tipo di studio, bo mester pensa tambe kico ta mi chens pa haya un trabao si mi kier bin back Aruba. Den e grupo di studiante cu a bin e aña aki un grupo grandi ta sigui un studio pa International Business. No tin nada malo cu e estudio riba su mes, pero compronde si cu bo lo mester competi cu hopi otro cu tambe tin e diploma ey,’ asina minister Besaril a bisa.

Den su discurso e mandatario a pone hopi enfasis riba sectornan na Aruba cu mester di profesionalnan local. Minister Besaril: ‘Aruba ta ricibi mas cu 1 miyon turista stay over. Nos tin hotelnan grandi cu tur hunto ta produci hopi sushi y te ainda nos no tin ningun Arubano cu a studia of ta interesa pa studia pa “Waste Management”. Aruba ta rondona pa awa y tur loke ta worde consumi mester worde importa. Pero ningun di nos hendenan ta studia economia logistico. Asina tin hopi otro sectornan manera salubridad. Den enseñansa di un scarsedad na docentenan pa wiskunde y Nederlands. Gobierno di Aruba kier mira e sector primario crece cu proyectonan inovativo. Tur ta sectornan cu por brinda e hobennan oportunidad grandi na Aruba,’ asina Minister Plenipotenciario Guillfred Besaril a duna di conoce na e alumnonan presenta na e encuentronan.

Tambe Minister Besaril a papia riba e otro aspecto pakico e ta bin ta pone enfasis riba e hecho cu mester por informa nos hobennan mihor. Y esaki ta tin di haber cu e escogencia pa bay studia na Hulanda. E mandatario a bisa cu lamentablemente e experencia e aña aki tabata ta, cu hopi hoben a yega Hulanda y nan no tin lugar pa keda; nan no tin un camber. Esaki ta un problema grandi pasobra tin un scarsedad enorme na camber pa studiante na Hulanda.

Y e scarsedad aki ta haci cu e prijs di huur pa un camber, principalmente den e ciudadnan grandi manera Amsterdam, Rotterdam, Den Haag y Utrecht ta hopi halto. E aviso di minister Besaril ta pa e hoben mira si e mesun estudio por wordi sigui na ciudadnan mas chikito manera Den Bosch, unda kisas ta mas facil pa haya un camber. ‘Hulanda ta un pais cu un otro cultura, balor y pensamento. Hopi hoben nunca a bay Hulanda y no tin un nocion kico ta spera nan. Kico ta nifica pa ta na ora, pa corre tras di un trein, tram of bus. Y cu e Hulandes ta hopi asertivo; hopi direct y nan ta spera di bo pa bo tuma responsabilidad propio pa tur cos cu bo ta haci,’ segun minister Besaril.

Despues di e discurso di minister Besaril, coordinador di enseñanza di Arubahuis James van der Linde a tene un presentacion riba “Studeren in Nederland”. Den e presentacion aki James a pasa riba tur punto cu e hoben lo mester tene cuenta cune na e momento cu e ta bay studia na Hulanda; di financiamento pa estudio te cu e weer na Hulanda. Un punto importante di e informacion aki tabata e facilidad cu Hulanda tin pa yuda bo haci un escohencia di un studio, den e caso aki e website Studiekeuze123. E website aki di e ministerio di Enseñansa di Hulanda na un manera hopi cla y den fasenan cu ta yuda bo haci un escogencia: mira ki tipo di estudio ta pas cu bo y na unda tur na Hulanda bo por sigui e estudio aki.

Na tur tres encuentro tabata tin hopi interes di e alumnonan y hopi di nan a haci uso di e oportunidad pa haci pregunta. Esaki a mustra cu e vision di Minister Plenipotenciario Guillfred Besaril a sirbi su proposito pa informa y prepara nos hobennan pa un estudio na Hulanda.  E potretnan ta cortesia di Cas di Aruba.

- Advertisement -

DUNA COMENTARIO

Please enter your comment!
Please enter your name here