ORANJESTAD (AAN): Despues di 1 aña di ausencia di e evento anual di Camara di Comercio y Industria Aruba (KvK), por wak atrobe na un Aruba Chamber Business Event 2018 cu lo bira sigur un evento comercial exitoso.
Pa e edicion di 2018 KvK, e intencion ta pa enfoca riba e importancia di sobrevivencia di e empeño comercial. Esaki según Vicepresidente di KvK Kawish Misier, durante un conferencia di prensa Diabierna mainta.
Misier hunto cu hefe di e departamento di Business informacion & Support Sue-Ellen de Freitas a duna un splicacion di e evento.
Nan a splica cu presentacionnan lo wordo duna, caminda lo comparti experiencia den un atmosfera agradabel acompaña pa diferente aperitivo y bebida.
Aruba Chamber Business Event 2018 lo tuma lugar di 30 di November 2018 den Renaissance Convention Center y e evento ta hiba como titulo: “Sustainable Entrepreneneurship”. E evento ta wordo patrocina door di Caribbean Mercantile Bank N.V.
E enfasis di e anochi ta riba empresaria sostenibel. En corto esaki ta significa cu como empresario bo ta keda alerta riba desaroyonan cu ta afecta bo negoshi y bo mercado. Bo ta actua door di tuma tur medidanan necesario cu ta den bo poder pa yuda cu bo negoshi no cay atras. Un negoshi cu no ta innova of ta adapta na e mercado dificilmente lo por sobrevivi y keda sostenibel.
Aruba Chamber Business Event 2018 lo cuminsa 7.30 di anochi hunto cu un bebida di bon bini y hunto cu un aperitivo. Pa e anochi a invita un orador local sra. Lisette Malmberg di De Palm Corporation N.V. y un invitado internacional sra. Angel Rich. Despues di e parti oficial, tur invitado ta haya e oportunidad amplio pa por intercambia pensamento y ideanan durante un ‘networking reception’. Pa clausura e anochi lo tin un presentacion di e banda musical Tsunami.
Sra. Lisette Malmberg no ta un persona desconoci den e mundo comercial na Aruba. Sra. Malmberg ta un empresaria, inversionista y un activista di husticia social. E ta un shareholder di De Palm Corporation N.V. y un veterano riba e tereno di industria turistico. Sra. Malmberg a hunga un rol importante den e directiva di AHATA pa hopi aña. Tambe e a forma parti di e directiva di Aruba Quality Foundation y Aruba Hospitality and Tourism Foundation. Sra. Malmberg ta hopi conoci tambe pa su fundacion Hope Aruba cu tin como meta yuda adictonan recupera di nan adiccion y asina bolbe bek den comunidad y funciona como un miembro productivo di nos sociedad.
E invitado internacional di e anochi aki ta un orador renombra den e mundo di innovacion y negoshi sostenibel. Sra. Angel Rich a logra na edad di 30 aña acapara varios titulo. Entre nan crea un algorithm pa e stock exchange y asina gana e Goldman Sachs Portfolio Challenge. Sra. Rich a bende un plan di mercadeo cu Prudential Financial cu ta un compania renombra den mundo di seguro. Sra. Rich a publica un buki titula “The history of the black dollar”. E a inventa producto pa yuda facilita e conocemento di productonan financiero.
El a inventa e online game CreditStacker cu ta un app pa yuda haci e conocemento financiero mas accesibel. Riba esaki e la wordo yama door di Forbes pa e “Next Steve Jobs” y a wordo galardona cu e titulo “Wealth Pioneer”.
