Segun directora di DIMP:
ORANJESTAD (AAN): Speel vergunnings recht manera cu nos conoce, ta den un ley hopi bieu. E ta un ley cu nan ta yama Speel vergunning rechten hazard spelen. Esey ta un ley cu ta regla e impuesto pa loke ta casinonan y tur tipo di wega cu tin cu ta wordo hunga den un casino, segun directora di Departamento di Impuesto (DIMP), Luenne Pieters.
Tin wega di mesa, tin weganan cu bo ta tira coins. Awor aki e mashinnan ta hopi mas sofistica, tin poker, sportsbetting. Ta tipo di weganan cu ta wordo hunga den casino. Un casino, manera tur otro negoshi tin cu paga belasting. Nan manera di cobra belasting of e manera cu nan lo mester raporta ta wordo regla den un ley specifico pa casino.
Tabata tin un discusion hopi aña pasa riba e grondslag, kico e mester ta. Awor aki den e ley ta Bruto bedrag der ontvangsten ta loke ta wordo belast. Tabata tin uitspraak di hues caminda cu ta bisa cu door cu tabata tin tanto discussion riba cierto maneranan pa raporta y paga belasting, cu a sali afo cu lo mester bay cobra riba e net win.
E net win ta bira e grondslag. Naturalmente awo e porcentahe mester subi, pasobra ta netwin ta wordo belast.
E porcentahe actual ta 4% y tin un ley den concepto cu for di 2007 a bay Staten, a bay Raad van Advies, a haya tur suconsehonan caba. E tabata na Staten pa e por a wordo trata. Esaki ta e ley.
E kansspelbelasting, ta algo otro. Si bo gana loteria, por ehempel na Merca, Hulanda, etc. belasting ta wordo kita prome cu e uitkering wordo entrega na e persona.
Na Aruba si bo gana Lotto of kico cu bo gana, no ta cobra belasting riba esey. Si bo gana 1 miyon, ta loke bo ta wordo paga.
Kansspelbelasting ta algo otro. E concepto di ley cu tey na parlamento ta e speel vergunning rechten hazard spelen. Esey ta trata tur cos cu e casino, con e casino lo mester raporta nan ganashi, pa na final pa paga belasting. Speel vergunning recht ta mesun cos cu loonbelasting of BBO. Tur luna casinonan mester entrega nan aangifte y haci e pagonan corespondiente y haci e pago corespondiente prome cu 15 di tur luna.
Pago di impuesto
E hungadonan di casino por ta trankil. Ora bo bay casino, bo hunga y gana, ta casino ta esun cu tin cu paga riba e ganashi cu nan tabata tin riba e wega eynan. Tin reglanan tambe depende di e wega, kico na final bo tin cu raporta, como e win di e momento ey.
E persona cu ta bay hunga cualkier cos den casino, no mester preocupa.
Kehonan di casino
Casinonan ta keha cu cos ta malo y a manda cierto mensahenan caba. Segun Luenne Pieters, a tuma nota di esakinan via minister. Tin di compronde cu lo bay papia cu e casinonan y scucha na preocupacion. Ta un concepto di ley cu e tempo ey tambe a wordo discuti cu nan. Tin di compronde cu nan ta preocupa cu e porcentahe cu tin den e concepto di ley y nan lo kier pa haci cierto calculacionnan pa wak kico ta e porcentahe cu lo mester bira pa asina e ta budget neutral.
Nan preocupacion ta cu nan lo no kier paga mas belasting, pero nan lo kier paga mesun hopi belasting cu nan ta pagando awo. Esey ta algo cu DIMP ta bezig cun’e pa asina duna minister un miho conseho tambe riba e tereno aki.
E keho cu tin ta e bida di casino no ta mesun un cos cu antes. Segun nan, nan entrada a cay. Por mira tur e entradanan durante e tempo cu nan a raporta y esey ta loke cu DIMP ta bay haci, pa asina percura pa yega mas cerca di otro. Pero tin cu corda tambe cu e situacion financiero na Aruba tambe ta un situacion cu no mester perde for di bista. Naturalmente entrada di belasting y invoerrechten ta loke ta contribui mas tanto tambe na e caha di gobierno.
E intencion si ta pa mira kico ta pasando, scucha loke ta pasando, nan preocupacion, pero tambe tene na cuenta cu tin un budget tambe pa haal y tin e situacion financiero cu nos tin cu tene cuenta cun’e.
