ORANJESTAD (AAN): E tabata un Diadomingo atardi yen di emocion, alegria, y orguyo ora cu a mira con cinco atleta, yiu di tera balente cu a sa di lucha contra tur forza di naturaleza, pa a logra haci un cruzada di Venezuela pa Aruba, den un promedio di ocho ora largo.
Esaki tabata un déjà vu completo di 1988, ora cu Roly Bisslik a haci mesun hazaña y e tempo ey a hasta haya mencion den CNN na Merca.
Awor na 2018, historia ta ripiti ora cu cinco atleta di Aruba Dolphins Swimming Club a ripiti e hazaña aki, cual a ser yama “Crossing for Hope” cu meta pa sostene Koningin Wilhelmina Fonds.
Diadomingo mainta pa 6:46 am exactamente, e cinco landadornan, Davie Bisslik, Romar Arendsz, Deaxo Croes, Stephan Thijsen, y Wendy Kock a drenta lama na Puerto Escondido, y como 8 ora despues, Davie Bisslik a yega tera na cas di Roly Bisslik, cu ta keda net un tiki banda di Zeerovers.
E ultimo etapa, su tata Roly a landa hunto cune y tabatey pa ta e prome pa dune un abrazo. Cu grito di alegria, y hendenan cantando Himno di Aruba, el a subi pier y asina acudi na specialistanan medico cu a check su curpa.
Nan tabata moviendo basta rapido riba lama, y nan tur tabata mik rumbo pa Refineria di Citgo na San Nicolas. Sinembargo alrededor di 7 kilometer for di Aruba, nan tur a topa cu e famoso coriente fuerte cu ta pasa zuid di e isla. E coriente aki a pone Davie bay pabao y a drenta te banda di Isla di Oro, y eynan cerca di rif a landa trankil y drenta na Savaneta.
E otronan, manera Stephan Thijsen, Deaxo Croes, y Romar Arendsz, a drenta mas pabao banda di Barcadera, y di eynan a bin den boto rumbo pa Zeerovers.
E landador femenino Wendy Kock, a bira e prome landador den historia cu a cruza lama di Venezuela pa Aruba. El a toca tera na altura di Nikky Beach, unda el a topa cu un multitud di hende cu a ricibie. Cu Ambulans el a ser transporta pa Savaneta pa asina uni cu e demas grupo y haya e examinacion medico.
Un weekend cu Aruba a keda yen emocion cu atletanan cu a demostra cu nan ta world-class athletes!
