Home Deporte Cinco landador ta cla prepara mentalmente y fisicamente pa nan hazaña Diadomingo...

Cinco landador ta cla prepara mentalmente y fisicamente pa nan hazaña Diadomingo awor

100
0
SHARE
- Advertisement -

ORANJESTAD (AAN)– E aña aki 11 di november 2018, 5 landado di e club di natacion Aruba Dolphins 1) Gwendolin Kock-Croes; 2) Romar Arendsz; 3) Deaxo Croes; 4) Davy Bisslik; 5) Stephan Thijsen bou di e supervicion y guia di Sr. Roly Bisslik lo bolbe ripiti e hazaña cu Roly a haci 30 aña pasa, cual ta landa di Venezuela pa Aruba.

E meta principal di e hazaña aki ta pa recauda fondo pa Koningin Wilhelmina Fonds (KWF). Cu e fondo recauda aki lo yuda KWF cubri gastonan di operacion anual. Apart di esaki KWF tin deseonan grandi cu solamente cu sosten di pueblo di Aruba lo por bira realidad. Por bay ariba www.crossingforhope.com pa opcionnan pa haci donacion. Di curason danki pa bo(so) noble contribucion.

Pueblo di Aruba ta invita pa presencia e yegada di e 5 landadonan dia 11 di November 2018. E punto di yegada lo ta den area di Zeerovers, Savaneta. Lo tin un actividad familiar prepara cu musica (Los Paranderos, Grupo di Betico, Rincon Boys, Tsunami y Nutzbeatz), cuminda (Burger Joint, Blue Barrel Café, Truck di Johannes y Piet Truck), cos di bebe y actividad pa mucha. E actividad ta di 11:00 am pa 5:00 pm. Ta spera e prome landado pa mas o menos 3:00 pm si stroom y ola coopera. Ariba e dia aki tambe bo lo por haci donacion. Lo tin diferente radio y television cu lo transmiti e evento aki.

Botonan cu lo desea di presencia e landa aki entre Venezuela y Aruba pa percura pa regla tur papel oficial cu Consulado y Douane. Algun punto cu mester tene cuenta cu ne pa no stroba e landadonan ta: keda cu un distancia di por lo menos 100 meter di e landadonan; no core duro pa lanta mas ola; core ‘downwind’ pa e holo di gasolin/diesel no molestia e landadonan.

E salida di e landadonan pa Venezuela den boto lo ta diabierna, 9 di November 2018. Pa keda na altura di tur desaroyo te cu dia 11 di November, like y follow e facebook page ‘Crossing for Hope’. E landadonan y KWF ta conta cu boso sosten.

 

Landado Davy Bisslik

Davy tabatin solamente 6 aña dia cu su tata, Roly Bisslik, a asombra pueblo di Aruba henter cu un logro cu hopi a pensa cu tabata imposibel. E dia ey, ni riba boto Davy no tabata por a bay, pero, a experencia e calor di e pueblo Arubano cu a presencia e yegada di su tata. Di chikito, Davy a pone como meta, cu un dia, e lo bay ripiti e hazaña aki. Awo, cu su 36 aña, pues net 30 aña despues cu Roly a marca historia, e ta mentalmente cla y madura pa cumpli cu un meta cu el a pone su dilanti desde cu e tabata chikito. Su casa, Melendy, ta sostene 100% den henter e trayectoria di preparacion. Roly ta enfatisa continuamente cu cada 30 minuut mester tuma pauze ora ta landa distancia largo. Durante e pauzenan, Davy ta come pan cu jam y pinda kaas, bacoba y pudding di chuculati. E ta bebe Gatorade y awa y sa dal energy gel. E trainingnan largo, ta un bon momento pa analisa ki cuminda of bebida ta baha bon. Pa por wanta un distancia largo, ariba un bon ‘pace’, Davy ta percura cu su strooknan ta largo y ‘smooth’. Tambe, e ta purba di no pone mucho forsa ariba e spiernan. Di chikito Davy kier a haci e hazaña aki. Specialmente como cu el a experencia cu e ta posibel. Manera Davy mes ta bisa: “Mi tata a prueba cu e ta posibel, pues ami tambe lo por”. E aña aki na augustus a recorda cu 30 aña pasa su tata a hacie, pues awo ta un bon momento pa rebiba locual su tata a logra. Davy ta spera cu e empeño cu e lo duna pa pisa suela di Aruba despues di a cruza lama di Venezuela pa Aruba, lo conscientisa nos pueblo cu movecion ta importante. E ta spera tambe cu pueblo di Aruba lo ta curason habri pa haci un donacion na Koningin Wilhelmina Fonds (KWF) ariba e dia aki.

Delaster un cos ta pasa den su mente ora e ta entrenando distancia largo. Tanto ariba cosnan cu no tin di haber cu landamento, como e tecnica pa landa pa por logra yega e punto final. Sin laga afo, cu hopi biaha e ta canta pa kita su mente di e cansancio. Davy ta den training continuo pa mantene condicion, pero a cuminsa entrena a base di un schedule di training prepara pa coach Roly specialmente pa e hazaña aki, na juni 2017. E parti dificil di e preparacion pa e gran dia aki, cu lo ta 11 di November, 2018, ta tur e sacrificio cu tin envolvi. Actividad, evento of encuentronan leuk, cu bo no por atende paso tin cu train e dia ey of e siguiente dia. Cu un agenda hopi ocupa, ta dificil tambe pa logra drumi trempan, pa e curpa tin bon sosiego.

 

landado Deaxo Croes

 

Deaxo ta un ehempel pa hopi cu ta kere cu bo mester a practica un deporte desde chikito pa por haci un deseo realidad. E tin un motivacion tremendo pa mehora su tecnica y ta tuma cada training hopi na serio. Despues di cada landa largo, e ta nota y sinti e mehoracion. Cu su 38 aña di edad, y hunto cu e otro 4 landadonan, e ta determina pa yega Aruba cu cara na laira, y bisa: “mi a logra”. Ora e landa distancia largo, e ta tuma pauze cada 30 minuut pa percura cu e tin algo den su stoma. Pa Deaxo, un bon alimentacion ta hopi esencial. E ta come ‘whole weat’ bagel cu nutela y ta bebe un likido cu ta un mezcla di rooibiet, ginger y likido di carbohydrate. Tambe e ta bebe ‘agua panela’. E tecnica cu Deaxo ta uza pa por logra yega final apesar di e cansancio, ta cu e ta purba di no pensa ariba e distancia of cuanto e falta pa yega, pero ta enfoca ariba su tecnica di landamento. Di hopi jong Deaxo tabata sinti un conexion hopi grandi cu lama. El a cuminsa principalmente cu ‘bodyboard’ y despues el a profundisa su mes den ‘apnea’, tambe yama ‘free diving’. Landamento tabata complimenta e sport di apnea. Mas o menos 4 aña pasa el a cuminsa experimenta cu landa distancia largo y desde e tempo ey ta enfoca ariba landamento so. Deaxo su meta principal pa participa cu e hazaña aki ta pa yuda otronan menos afortuna cu ne cu ta enfrentando un hazaña mas grandi cu ne, por ehempel esnan cu cancer of malesanan terminal. Pa medio di un landa asina e lo por duna honor na nan y nan hazaña y e dificultadnan cu nan ta enfrentando.

Deaxo tin un ‘playlist’ mental y e ta ripiti e cancionnan den su mente. E ta haci su esfuerzo pa keda den e momento, den e presente. E sa corda tambe ariba su sernan keri, specialmente esnan cu no ta cu ne mas, cual e ta dedica e landa aki na nan tambe. El a cuminsa cu training di landamento 4 aña pasa y na juni 2017 hunto cu Davy, nan a cuminsa cu e training prepara pa coach Roly specificamente pa e hazaña. E no lo uza e palabra ‘duro’ pa describi e trainingnan. El ta disfruta di cada momento cu e ta experencia y tambe tur e amistadnan nobo cu el a wordo bendiciona cu ne. Si tabatin dianan cu ora e lesa e ‘training schedule’ e ta pensa: “awe si mi no ta bay logra”, pero manera e mes ta bisa: “bo tin cu djis cuminsa cu e prome set y e resto ta bin di su mes”. Locual e ta hinca den su mente ta pa no pensa cuanto e falta pa caba si no djis sigui bay.

 

landado Stephan Thijsen

Stephan ta e mas hoben di e grupo di 5 cu lo crusa lama bruto di Venezuela pa Aruba. E tin 22 aña, cual ta mucho mas hoben cu Roly mes tabata na 1988 ora cu el a haci e mesun hazaña aki. Stephan no a nace e tempo ey ainda, pero el a lanta ta scucha e storia di Roly su logro si. Durante landanan largo, Stephan tambe ta tuma pauze cada 30 minuut pa pone algo den stoma y hidrata. E sa come pan cu pinda of pan cu jam y pinda. Bacoba e ta come como fruta, cual ta facil pa kauw y e zoet ta necesario. E granola bar ‘Nature Valley’ tambe e sa come, pero e ta menos preferi como cu e ta un poco mas duro pa kauw. Stephan ta bebe energy gel, gatorade y un otro bebida energetico natural. Awa e no ta bebe. E no ta baha dushi paso ta sinti cu e ta daña e stoma. E ta un persona cu no ta rindi facil. Den Stephan su caso tambe, e poder mental ta hunga un rol. Unabes e wak e punto cu e tin cu yega, cansa of no, adrenalina ta coy curpa y motivacion ta lanta di biaha. Stephan tin 11 aña ta practica e deporte di natacion. El a cuminsa cu e deporte di baseball na un edad mas hoben y despues a enfoca mas ariba landamento. Di hopi jong caba Stephan tabata interesa pa pone su mes riba prueba y haci e landa largo aki. El a yega di comenta esaki na Roly basta tempo pasa. Ta custumber di Stephan pa entrena tur diadomingo open water. Un dia, cordando ariba Stephan su deseo, Roly mes a bis’e pa dal bay cuminsa entrena cu e otronan cu ya a cuminsa nan training pa e gran dia caminda cu lo crusa lama di Venezuela pa Aruba. E oportunidad a bati na porta y Stephan sin duda a acepta pasobra no kier perde e chens aki. Ora e ta entrenando, su mente ta bay ariba hopi cos. Bo pensamentonan ta bula di un cos pa e otro. Semper e ta purba pensa ariba algo cu ta kita e concentracion di locual e ta haciendo. Sin laga afo, e mes ta keda empuha su mes pa sigui y no stop. Di e forma aki, e sa cu ora e haya dolo, con pa supera esaki. Stephan a cuminsa entrena bou di guia di Roly specialmente pa e hazaña aki na September 2017. Segun Stephan, preparacion pa e gran dia ta bayendo bon. E no tin dificultad cu e trainingnan.

 

landado Romar Arendsz

 

Romar ta un atleta cu a cuminsa cu e deporte di natacion desde chikito. Su coach Roly, a wak e crece y desaroya tanto como atleta y awo como docente di movecion y salud. Cu si 38 aña y un trayectoria largo como atleta den tanto natacion, ciclismo y coremento, Romar ta determina pa logra e meta cu el a pone su dilanti desde cu e tabata basta hoben. E alimentacion di un atleta cu ta landa un distancia asina largo (± 32 km) ta hopi esencial. Locual Romar ta come durante su pauzenan cada 30 minuut ta bacoba, patia y pan cu jam. E ta bebe likido cu proteina y caloria, gatorade/powerade y awa tambe e ta percura pa tin abordo di e boto cu ta compañe. Coca Cola cayente sin gas tambe e sa bebe. E ta un persona cu no ta rindi facil. Ora curpa ta cansa y ta wak cu final no ta na caminda, e ta pensa hopi biaha ariba su yiu. E sa cu su yiu stime hopi y e no kier desapunte. Romar ta pensa tambe ariba su coach, Roly, cu ta dedica tanto tempo y esfuerzo pa percura pa nan ta bon prepara tanto fisicamente como mental. Roly ta un di e personanan cu tampoco e kier desapunta. Durante un participacion asina, bo ta bira spiritual. Mane Romar mes ta bisa: “Mi sa pidi Papa Dios yuda mi”. Roly tambe semper ta bisa nan busca Dios. Su carera como landado a cuminsa di masha chikito. Romar su mama a mande les di natacion pasobra e tabatin sintoma di asma. Cu 6 aña el a participa na su prome competencia. Esaki tabata prome cu el a ricibi tur su diplomanan. Te dia di awe ainda e ta landa, specialmente pa competencianan di triathlon, half iron man y iron man.

Un di Romar su soñonan tabata pa participa pa iron man y a logra finaliza esaki den 12 ora. Tambe el a core 72 km su so, durante e evento di Ronde van Aruba. Aunke e landa di Venezuela pa Aruba ta un evento diferente, e ta pensa cu un forsa mental fuerte, e lo por logra. E ta sinti cu awo ta e bon momento pa e desafio aki y e ta cla p’e. Romar kier mustra hendenan cu problema di salud of hendenan cu mester di un push den nan bida rutinario pa no give up, ni maske e circunstancia. Manera e mes ta bisa: “Just believe in yourself that you can do it and go for it no matter what”. “E mente ta mas grandi cu e curpa!” Na tur momento Romar ta purba keda calmo y no emociona mucho. E ta keda ripiti den su mes pa sigui, pa djis keda pusha. Ora cu e grupo a cuminsa entrena pa e hazaña Romar tabata train tambe, pero enfocando mas ariba otro eventonan manera triathlon, marathon, iron man, Ronde van Aruba y otro competencianan di coremento. E trainingnan enfoca specificamente ariba e hazaña mes a cuminsa mas o menos na December 2017.

 

landado Gwendolin (Wendy) Kock Croes

Wendy ta e unico dama entre e 4 masculinonan cu lo cruza lama cu mesun coraje y confianza pa pisa suela di Aruba. E tin 41 aña di edad, casa cu Andy Kock y cu dos yiu muhe yama Florence y Gwennandy (respectivamente 18 y 16 aña). Mescos cu e otro 4 atletanan, durante e landa, cada 30 minuut e ta tuma pauze pa bebe y come algo. Locual Wendy ta come, cu ta cay bon den su stoma ta: patia, druif y apelsina. Tambe e ta come pan cu pinda of pan cu muisjes. Patia ta e fruta cu ta baha mas miho durante un landa di distancia largo, como cu e tin hopi awa. E ta bebe energy gel, grape juice, gatorade of softdrink cora. Awa si Wendy no sa bebe, e mester ta algo cu tin smaak y sucu. Wendy tin un forsa mental hopi fuerte. Ora e ta sinti poco cansa y ta sinti cu e stroom ta duro, e ta keda papia cu su mes y pone metanan chikito. Por ehempel, un di e biahanan cu nan a train distancia largo, nan a yega te Casa del Mar. Wendy ta conta cu e mester a lucha hopi pa percura pa yega. Sinembargo, e siguiente training largo tabata te Marriott, el a ripara cu el a yega den e area di Casa del Mar cu hopi menos dificultad. Esaki a dune un empuhe y a lanta e confianza den su mes. Tambe Wendy ta keda corda ariba tipnan cu nan ta ricibi di Roly. Un di nan cu e ta purba practica ta pa percura pa cada brasada ta mas largo posibel. Desde chikito caba Wendy a logra haya diploma A te F di landamento. Wendy su prome competencia di landamento tabata na April di aña 1986. E tabatin apenas 8 aña. Esaki a tuma luga na POVA. El a gana 6 medaya di oro cual tur tabata den tempo record. Wendy nunca a stop di landa. Te dia di awe, cu 2 yiu grandi, nan ta entrena hunto. Sin laga afo, e ta un instructor di natacion escolar di profesion.

Wendy ta custuma di train tur diadomingo open water hunto cu tur e otro atletanan di Aruba Dolphins pa mantene e condicion. Un dia Roly mes a puntra Wendy dicon e no ta train hunto cu e otronan cu ta entrenando pa e hazaña. E no a pensa dos biaha. Wendy a acepta y asina e trainingnan a bira no diadomingo so, si no 6 biaha pa siman. Ademas, e ta sostene e meta principal, cual ta pa recauda fondo pa Koningin Wilhelmina Fonds (KWF). Wendy su mama mes a fayece di cancer ora Wendy tabatin apenas 8 aña. Awor cu e por contribui na e bon causa aki, e ta ofrece tur e sosten cu e por duna. Ora e ta entrena den piscina, su mente ta den blanco. Ora e ta entrena den lama, e ta wak abou, e piscanan/cualnan. P’e, e ta un aventura diferente como cu nunca bo ta haya e lama mescos. Tin parti ta calmo y otro parti ta bruto of tin parti tin stroom of coriente cual por ta na bo fabor of contra. Semper tin un pida cu nos ta yama ‘wasmachine’ cu sa ta calmo of e por ta riba ‘high speed’ tambe. Wendy a cuminsa entrena pa e hazaña aki na februari 2018. E tempo ey el a cuminsa train a base di e schedule di training prepara pa coach Roly specialmente pa e hazaña. Prome cu esey e tabata den training si, pero mas pa condicion. E parti mas duro di e proceso di preparacion ta lanta mainta trempan pa bay training di 4.30 am na piscina 3 biaha pa siman. E trainingnan di atardi ta poco mas facil pa cumpli cu nan. Ultimo periodo di preparacion aki nos ta haya dry-land training tambe.

 

Fotos cortesia di 297 sports.

 

 

- Advertisement -

DUNA COMENTARIO

Please enter your comment!
Please enter your name here