Home Hudicial Corte: Acusado tabata horta coriente di Elmar pa asina cultiva marihuana...

Corte: Acusado tabata horta coriente di Elmar pa asina cultiva marihuana na cas

1185
0
SHARE
— El a causa como 23 mil Florin na daño na e cas.
- Advertisement -

ORANJESTAD (AAN): E homber Colombiano R. a splica Hues cu e plantacion di marihuana cu e tabatin den un cas cu e tabata huur, ta pa e traha cannabis oil pa yuda hopi hende cu enfermedad. E ta worde acusa di tabatin mas cu 300 mata “indoor” o sea den e cas y tabata horta coriente di NV Elmar.

Fiscal a exigi trabao pa comunidad y cu R. lo mester paga un daño na doño di e cas. Hues a dicta sentencia di biaha y a condena R. na castigo condicional, trabao pa comunidad y mester paga un suman di daño.

 PLANTACION:

E acusacion cu Fiscal a presenta contra R. ta cu entre November 2017 y Juni 2018, e tabatin plantacion di marihuana den un cas cu e tabata huur. Tambe e ta worde acusa di tabata horta coriente di NV Elmar pa por haci plantacion. Tambe e ta worde acusa di a causa daño na e cas.

Hues a mustra cu segun investigacion di Polis, R. tabata huur un cas y a laga manipula e meter di coriente di Elmar pa asina e tin su plantacion di marihuana den e cas. Den Corte el a admiti cu e tabata 9 luna ocupa. Hues a mustra cu ta sera papia di un plantacion di 308 mata. Segun R. no tabatin asina hopi. Pero ta admiti cu tabatin hopi mata.

DEMANDA:

E dama W., cu tabata huur e cas na R., a presenta den Corte y a haci demanda di daño. Un homber cu kier a cumpra e cas tabata den Corte y a hiba palabra pa cu e dañonan. Segun e homber, tabatin un reunion ariba peticion di abogado mr. Illes caminda experto a calcula e daño na 120 mil Florin. Pero te dia di awe no a tende nada mas.

El a remarca cu R. a sali liber. El a bisa cu el a hala atras pa cumpra e cas. A presenta calculacion di un otro contratista 160 mil Florin.

R. a bisa Hues cu e tabata paga e dama W. 2 mil extra y cu W. tabata sa kico tabata sosode. A palabra cu lo bay drecha cas promer cu entrega esaki. El a remarca cu ora tabata calcula e muher W. tabata pidi hinca mas cos den e calculacion pa drecha siendo cu eseynan no ta cos cu e mester a drecha. E ta haya cu 120 mil Florin ta rediculo y cu e suma aki bo ta traha henter un cas.

CANNABIS PA CURA HENDE:

Hues a mustra cu R. ta promer biaha cu e ta cay sera. El a puntra, con por ta cu R. ta huur un cas y ta converti esaki den un plantacion di droga.

R. a splica Hues cu na 2014 su wela a fayece door di cancer y esey a motiv’e pa yuda hende cu cancer y otro malesa door di produci cannabis oil. El a sigui bisa cu ta un secreto publico na Aruba cu e tabata yuda cantidad di hende cu cannabis oil. El a bisa cu W. tabata sa esey y cu el a yuda famia di W. tambe.

Abogado mr. Illes a bisa Hues cu pa loke ta e calculacion di daño, ora el a bay na e cas hunto cu e experto, loke ta considera cu mester drecha a sera calcula na 23 mil Florin.

EXIGENCIA DI FISCAL:

Fiscal a bisa cu R. ta pretende di ta yuda hende cu cannabis oil pero e ora ey no ta bay horta coriente. Abogado a bisa cu ta dispuesto paga un daño. Fiscal a tene cuenta cu R. ta “first offender” y a keda 9 dia sera. El a exigi castigo igual na loke R. a sinta caba. Fiscal no ta haya cu R. mester bolbe bay sera. El a exigi 200 ora di trabao pa comunidad. 2 luna di prison condicional cu un tempo di prueba di 2 aña di prueba.

Pa loke ta e asunto di daño na e cas, Fiscal a bisa cu e pregunta ta kico ta e daño real. Tin documentonan caminda cu e doño ta mustra murayanan paden y pafor pa drecha. Fiscal ta haya cu no tin un bista cla kico realmente mester drecha. El a mustra cu abogado a desmenti e 120 mil Florin y ta papia di 23 mil Florin cu ta cubri e daño di e plantacion di marihuana. Fiscal a pidi Hues pa confirma e 23 mil Florin y pa declara no admisibel e demanda di e doño. El a bisa cu e doño por bay haci un caso civil.

ABOGADO:

Abogado mr. Illes a bisa cu R. a splica cu e ta conoci pa cannabis oil. E abogado a splica cu el a experencia con e cannabis oil ta yuda hende cu cancer. El a papia cu R. si e kier haci trabao pa comunidad y e ta dispuesto. E ta haya e exigencia di Fiscal na su lugar.

Abogado mr. Illes a cuestiona e demanda di daño di parti W. E ta haya cu no ta acusando R. di destruccion den cas. Ta papia di hortamento di coriente, pero den ningun raport no ta calcula e gastonan di drecha e coneccion di electricidad. E ta kere cu mester declara e demanda no admisibel.

SENTENCIA:

Hues a sera tratamento di e caso y a dicta sentencia di biaha. Hues a bisa cu e ta haya legalmente proba e acusacionnan y R. ta admiti esey. Na opinion di Hues, marihuana tin un efecto criminal. R. ta bisa cu ta pa medicina pero Hues ta haya cu plantacion den marihuana den cas por causa candela.

Hues a condena R. na 69 dia di prison di cual 60 dia ta condicional. El a confirma e 200 ora di trabao pa comunidad y si R. no cumpli e lo mester bay 100 dia sera.

Pa loke ta e demanda di daño, Hues a bisa cu e no ta sigui abogado completo pa cu daño haci na e cas. Hues ta haya cu tin daño directo door cu a haci plantacion den e cas y a horta coriente. Hues a confirma e exigencia di Fiscal na 23 mil Florin. El a declara e resto di demanda no admisibel. Hues a pone tambe e medida di paga contra R.

 

- Advertisement -

DUNA COMENTARIO

Please enter your comment!
Please enter your name here