Home Policial Crusero a yega Aruba cu caso cruel di asesinato abordo

Crusero a yega Aruba cu caso cruel di asesinato abordo

18223
0
SHARE
— Aki por mira e haltura cu e muher a wordo benta for di halto, y el a cay riba Lifeboat #2.
- Advertisement -

ORANJESTAD (AAN): Tabata Diabierna 9 di November, cu e barco “Royal Princess” di e compania Princess Cruises a bandona puerto di Fort Lauderdale, pa un viahe di 8-anochi den parti zuid di Caribe.   Royal Princess ta un barco cu a wordo fabrica na 2013, y ta pertenece na Princess Cruise Lines.  E ta nabega bao bandera di Bermuda.

— El a wordo benta for di bao e borchi “Royal Princess”.

Despues di a nabega tanto Diasabra como Diadomingo riba lama, el a yega Curacao pa 8:00 am riba Dialuna.  El a keda como 14 ora mara na Willemstad, y pa exactamente 10:02 pm a bandona e isla, y a sali rumbo pa Aruba.

Pero algo a bay malo durante e cruzamento entre Curacao y Aruba.  Testigonan a bisa cu banda di 4:00 am, ora cu e barco ta pariba di Aruba ainda, un pareha a cuminza haya problema cu otro, na momento cu nan tabata riba Lido Deck, cu ta piso 16.

E homber a wordo describi como un persona ‘musculoso’, y hendenan a mira con e tabata bringa y lucha cu e muher.  Dado momento el a choca e muher y inesperadamente el a haci algo cu a shock tur hende eynan.  El a hisa y benta e muher over di e railing di piso 16.

 CAY RIBA LIFEBOAT #2:

Hendenan a spanta y a kere cu e muher a cay den lama.  Pero e muher a bay cay net riba Boto Salbabida #2, kibrando por lo menos 2 bentana di e boto, y a fayece instantaneamente.  E homber musculoso a wordo teni y hiba na un lugar safe.

— Autoridad hudicial y personal forensico di BFTO a bay Waf.

Demas pasaheronan a haya sa cu algo a bay malo, ora cu nan a tende un Anuncio riba speakernan pa 4:30 am, ora nan ta pidi pa Security Team acudi na piso 7, net bao di Lifeboat #2.

Mientras tanto, via radio caba e Capitan a haci peticion na Capitania di Aruba, pa prepara Polis y demas expertonan forensico pa ora nan yega.  Ta normal cu un Capitan ta pidi asistencia di Cuerpo Policial di e pais unda e barco ta mara, como cu “Polis Internacional” no ta existi.

E escena na deck 7 y e boto di salbabida tabata yen di sanger, y e personal di barco mester a warda te ora cu e investigacion di Polis a finaliza, prome cu nan por a haci e lugar limpi.  Por lo pronto Lifeboat #2 no por wordo usa, y posiblemente tin di wordo reemplaza door di e compania.

E barco a mara na Aruba pa 7:27 am, y team di Polis, Recherche, y specialistanan forensico di BFTO tabata wardando na Waf caba.

E momento ey nan a drenta, y e barco a prohibi tur pasahero di baha, te ora cu autoridad a duna OK pa haci esey.

MURI DI CHOCAMENTO OF DI CAIDA:

Algun turista tabata kere cu ta un accident e ta, of kizas un suicidio.  Pero personal di security y tambe Polis ta sospecha cu e por ta un asesinato, y no un accident.  Security Team di e barco lo suministra Polis cu tur security-video footage tambe cu lo por a capta e susedido.  Tin indicacion cu videocamera lo a capta momento cu e homber a pusha e dama over di e railing.

Fuera di esey, ta bay haci Autopsia riba e restonan mortal di e victima, pa check si acaso el a wordo mata door di e chocamento prome cu el a wordo benta di e railing.  Pues tin di check si el a muri di e chocamento (asfixiamento), of door di e golpi di e caida (trauma).

E barco ta keda Aruba pa 14 ora y pico, y Diamars mes pa 10:00 pm ta bandona Oranjestad, y ta bay rumbo Bonaire unda e lo yega Diaranzon pa 7:00 am, y despues ta sali pa 5:00 pm pa asina regresa Fort Lauderdale unda e ta yega Diasabra mainta.

E barco tin capacidad di 3.600 pasahero.

Pa un NEW UPDATE click AKI.

- Advertisement -

DUNA COMENTARIO

Please enter your comment!
Please enter your name here