Director di DAS Glenda Hernandez:
ORANJESTAD (AAN) – Sra. Glenda Hernandez a duna di conoce den conferencia di prensa, cu e trabao riba e Plan di Crisis Social ta bayendo hopi bon te aworaki, den sentido cu e dienst ta canando, y ta bay bin ayudo.
DAS ta bay traha riba tereno di prevencion mas tanto, por ehemplo, no ta bay haci hopi trabao riba personanan cu ta hopi leu den droga. Esaki encuanto e plan di crisis social mes, debi cu no esey no ta tarea di DAS.
Pero si ta asina cu nan kier gara e hoben cu ta cuminza experimenta. Gara e mucha na su crack na tempo. Tambe nan kier yuda e hoben cu problema psiquiatrico cu ta riba caya y cu ta duna hopi molester na famia y na e sociedad.
Na 2019 ta bay lanta y habri un centro di cuido pa muchanan cu tin un tipo di handicap cu no por wordo cuida na cas, pasobra nan mayornan ta haya hopi stress. Nan lo tin disponible 22 lugar den e centro aki. Esaki ta asuntonan cu no ta chikito y cu gobierno ta bay haci disponible.
Parti di e plan tambe ta cu muchanan cu nace WGK lo bishita nan cas, den cual bario cu ta, bay papia cu e famia y analiza cual ta e riesgonan cu tin den e famia y duna aporte.
Otro aspecto ta registracion di tur famia cu ta pasando mal actualmente, riba tereno social. DAS ta casi na yega na escogencia. E ta bay bira entre un sistema cu ta wordo uza door di UNICEF, of un sistema unda cu ta bay registra den e barionan unda e riesgonan mas grandi ta. Lo cuminza traha riba scolnan pa wak kico ta e riesgonan di mas grandi cu nan tin. Tur esaki ta tumando lugar caba.
Tambe e mama soltero teenager, unda cu problemanan social a bay for di man, y e yiu mester a bay Casa Cuna. Nan lo haya un man pa yuda nan cria nan yiu, pa otro biaha e situacion aki no ripiti. Sra. Hernandez a reitera cu tur esaki ta tuma tempo.
Sra. Hernandez a acentua cu esaki no ta bay wordo resolvi den un aña, pasobra ta algo cu a bay fout for di hopi aña caba.
Segun ponencia di sra. Hernandez, si den sector hotelero tin intencion di aumenta e cantidad di cambernan, pensa riba e tereno social pasobra mas camber di hotel ta nifica mas hende, y mas problema social, pasobra esnan cu ta bin di afo, no ta esnan cu ta financieramente mas stabil, sino esnan cu tin hopi problema social tambe, y por forma un problema si nos no ta conciente di e asunto aki.
