ORANJESTAD (AAN): Fundacion ELSKA ta invita Comunidad di Aruba pa asina bin aporta na nan feria prome cu temporada di Pasco, Diadomingo awor 4 di November 2018.
Riba e parkinglot dilanti Santa Cruz Bar, dilanti Botica Santa Cruz y Taco Bell, lo tin Mauchi’s special drinks y articulonan na hopi bon prijs.
Lo tin e agrupacion di gaitas Las Unicas, lo tin ayaca, pan dushi, sopi cu funchi, matanan cultiva local, berdura y fruta na bon prijs, pa mucha lo tin actividad y hopi mas pa asina un y tur pasa entre 10’or di mainta y 2’or di merdia.
Fundacion ELSKA a worde funda na aña 2015 cual a sigui pasonan preparativo pa asina por brinda Comunidad di Aruba y tambe apoya otro Fundacionan. E aña aki 2018 a cuminsa cu algun proyectonan, a ehecuta diferente proyecto pa nos Comunidad cu mucha, hoben y adulto.
E pensamento ta cu bibando den un Comunidad feliz ta e simiya cual ta sembra e oportunidad pa crece y biba riba un país feliz. E Fundacion ta feliz si e por haya boluntario.
Botica Santa Cruz lo ta habri Diadomingo tambe, y nan tin un profesional presente pa check sucu, presion, y cholesterol, y tambe tasting di varios producto.
