Home Editorial Editorial: Aruba ta cera 2018 cu un compromiso cu 2019

Editorial: Aruba ta cera 2018 cu un compromiso cu 2019

86
0
SHARE
- Advertisement -

Aña 2018 a topa Aruba den un situacion di incertidumbre. Un Gobierno nobo dirigi pa Prome Minister Evelyn Wever-Croes, a tuma rienda di e pais den su man. El a acepta e reto enorme di para na timon di Aruba cu no tabata consciente di e peligernan grandi cu e situacion financiero y economico tabata presenta.

Aruba for di 2014, ora ya e pais tabata den problema grandi y preocupacion serio tabata presente cerca expertonan manera rapportnan oficial ta mustra, a biba cu soñonan y fantasia sin mira con solo tabata baha pa e pais.

DIARIO a considera su deber a base di su compromiso cu Aruba, pa analisa y presenta na Aruba e realidad scondi den cifranan, relatonan financiero y economico. E berdad financiero y economico di Aruba a wordo disfrasa te final dor di promesanan gubernamental falso y falta di informacion di instancia independiente cu no por a funciona bon debi na entre otro falta di experto den su servicio.

Mientras cu cambio di gobierno, mas y mas informacion oficial cu tabata duna bista corecto riba loke ta pasa na Aruba a cuminsa sali den publicidad local y internacional, nos a asumi nos realidad y a habri wowo di Aruba.

Awe Aruba por pone su base pa un futuro nobo. E mundo di fantasia cu gobernacion anterior a crea, a ser reemplasa pa accionnan honesto y e hermentnan experto dor di e gobierno di Evelyn Wever-Croes, cu a enfrenta e situacion manera mester ta.

Gobierno Evelyn Wever-Croes mester a scrap e piñata di gobierno Mike Eman, cu a pone pueblo hubila pa reapertura di e refineria pero cu gobierno Eman tabata sa cu lo no por realisa. E proyecto aki tabata e motibo principal cu awe ningun experto por papia di stabilidad economico y financiero na Aruba.

For di 2016 gobierno Mike Eman a laga Aruba biba cu e ilusion cu na 2018 portanan di bonansa lo a habri pa Aruba pasobra el a firma un acuerdo cu un compania di gobierno Venezolano.

Den e cifranan y splicacion di instancianan oficial di Aruba, cu na 2018 porfin ta haya e luga cu nan merece, por mira con Aruba a ser afecta na 2018 dor di e situacion na Venezuela. Rehabilitacion di CITGO no ta aparece den rapportnan experto cu si ta presenta e resultado pa consumidor y economia di e tempo cu Venezuela a cera su portanan cu Aruba.

E rapportnan di expertonan ta rementa e fantasia cu Gobierno Mike Eman a pone pueblo di Aruba biba aden mientras na forma iresponsabel tabata gasta placa y aumenta e debe nacional.

2018 a presenta Aruba e berdad cu si sacrificio no ser haci y si gobierno Wever-Croes no asumi su responsabilidad, Aruba lo drenta ambiente di bancarota.

Na 2018 pueblo no por a baila bou e piñata yena cu ilusion falso cu gobierno Mike Eman a laga atras. Pueblo di Aruba mester a bisa “si” na su compromiso sagrado cu su pais cu hunto cu su expertonan y nan guia ta prepara pa 2019 ora stabilidad lo bira realidad.

Stabilidad no ta nifica rikesa. E ta nifica cu e pais conoce su situacion y ta haci proyeccionnan realistico cu proyectonan realisabel y a base di realidad. Stabilidad ta continuidad cu ta visibel ora organonan oficial manera Banco Central di Aruba, e autoridad monetario di e pais, y Algemene Rekenkamer Aruba, e organo mas halto di control di pais, por haci nan trabou. Nan ta guia gobierno y parlamento cu mester evita confusion riba e estado financiero y economico di e pais.

Aruba no ta cera aña 2018 cu un soño falso. Aruba ta enfrenta 2019 cu un compromiso fiho y tur e hermentnan pa subi caminda pa un futuro di bienestar. Den e proyeccion di Banco Central di Aruba no tin fantasma pero cifranan realistico cu tur sector por uza pa participa den e lucha pa rescata Aruba.

E cifranan cu Algemene Rekenkamer Aruba a presenta den e cuenta anual pa  2017, ta presenta na pueblo e motibo pa cual na 2018 Aruba mester a cambia su rumbo.

Na 2019 nos tur mester traha hunto, reuni bou di e bandera di Aruba pa cu bendicion di Dios, nos alcansa pronto e recuperacion di nos dushi tera.

- Advertisement -

DUNA COMENTARIO

Please enter your comment!
Please enter your name here