Home Editorial Editorial: Aruba: un Pueblo, un Bandera, un Himno, un Idioma, un...

Editorial: Aruba: un Pueblo, un Bandera, un Himno, un Idioma, un DIARIO

51
0
SHARE
- Advertisement -

Dia 3 di november 1982 Aruba a yama bonbini na e instrumento cu ainda tabata haci falta, pa por a haci su soño historico realidad. Tabata dia 3 di november, cu e Arubiano Jossy Mehsen Mansur, a entrega Aruba e spada necesario pa por a converti su lucha di alma y curpa den un realidad nacional y un futuro nobo pa e pais.

Na añanan 80 ya Reino tabata consciente cu Aruba lo no a dal un stap atras pero lo a hisa su bandera y cantando su himno,  percura pa un cambio estatal cu lo a pone gobernacion di e isla den su propio man.

E Pueblo di Aruba, reuni den alma di un historia di hende balente y patriotico, tabatin tin su Himno. E tabatin su Bandera. Na 1982, despues di manifestacionnan y accion estatal, Aruba a ricibi for di man di Jossy Mehsen Mansur un DIARIO, un matutino skirbi na e idioma autentico di Aruba.

Di e forma aki, Aruba a haya caminda pa oficialisa y pone mundo respeta su idioma, su version di Papiamento, a base di e cultura, educacion y historia di Aruba.

Jossy Mehsen Mansur a uza su propio medionan financiero pa asina evita cu e aspecto financiero lo por a stroba mundo comprende cu “berdad nunca a perhudica ningun causa ni ningun nacion” pero cu berdad a bira e baluarte pa mundo acepta Aruba, respeta Aruba y aplaudi Aruba como un isla chikito cu no a permiti ni miseria, ni hamber, ni e problemanan di mas grandi, stroba nacemento di un pueblo cu no a bende su propio caracter.

Ta cu su himno, su bandera, su idioma, su matutino, su cultura, su caracter propio, Aruba a entrega na 1983 un mandato na e delegacion Arubano encabesa pa e Arubiano cu a introduci e palabra y concepto di Status Aparte Betico Croes, pa negocia libertad di Aruba.

Desaroyo di e Conferencia di Mesa Rondo, tabata alcansa oficina di DIARIO caminda e alma patriotico di Jossy Mehsen Mansur tabata ofrece Aruba e informacionnan cu a culmina cu e participacion di Betico Croes cu dia Prome di Januari 1986 Aruba lo acepta su Status Aparte caminda pa su Independencia si Reino a sigui mantene cu e no ta acepta autonomia Arubano den Reino.

Na momento di realisacion di Status Aparte, Ministerio Publico y Banco Central a ser poni den man di Aruba cu asina a haya e hermentnan importante pa por a construi un futuro nobo.

DIARIO a percura pa pueblo di Aruba tuma nota di tur cambio estatal pero tambe tur momentonan cu e pais mester a uni den alegria, den dolor, den triunfo y den calamidad, na e idioma autentico di Aruba cu ortografia Arubano.

DIARIO no a acepta ningun compromiso economico of financiero cu por a stroba e pensamento di Jossy Mehsen Mansur cu solamente berdad por a guia un pueblo na un miho mañan.

E realisacion di Status Aparte no tabata un areglo riba papel, pero e alma estatal pasional di un pueblo, cu ta confronta cada periodo den su historia cu e instrumentonan mas poderoso cu ta su cultura, su caracter nacional, su bienestar, su berdad, cu mundo henter mester acepta.

Aruba ta Aruba y ningun hende por cambia of mishi cu loke ta propio di e pais ni destrui e bienestar general.

DIARIO naci for di patriotismo Arubano, semper lo defende e autenticidad di e pais y bienestar di tur Arubiano cu ta na cas na DIARIO caminda tur ciudadano por topa como hende, como miembro di un comunidad cu a lucha pa loke Aruba ta awe.

Na e forma aki, un dia prome cu celebracion di aniversario di DIARIO, nos kier confirma nos compromiso cu pueblo di Aruba.  Den e temponan dificil cu Aruba ta pasa aden, mas cu nunca nos lo tene na e lema di nos fundado, nos ehempel di un ciudadano cu a entrega su mes na bienestar di su pais.

Jossy Mehson Mansur lo ta presente semper den DIARIO. Asina e lo percura pa tene e candela di patriotismo cendi cu e herencia hancra den e palabranan”Berdad nunca a perhudica ningun hende ni ningun pais.” Berdad: e alma di Aruba liber y feliz, respeta pa henter mundo.

 

 

 

- Advertisement -

DUNA COMENTARIO

Please enter your comment!
Please enter your name here