Home Editorial Editorial: Cas social ta di importancia vital den situacion actual

Editorial: Cas social ta di importancia vital den situacion actual

18
0
SHARE
- Advertisement -

Cu satisfaccion DIARIO a tuma nota di e presentacion di FCCA cu a anuncia construccion di 84 cas social. E situacion actual di Aruba ta exigi un atencion creciente pa vivienda social y un prioridad grandi si nos kier enfrenta e problemanan mas importante cu Aruba ta experiencia.

Sin duda FCCA directamente ta aporta na e sector economico di construccion cu ta aporta na mas cupo di trabou, mas entrada pa famianan y mas circulacion di placa. Awe, sinembargo, nos kier atende cu e parti social den e aña cu e crisis financiero di Aruba a bira e responsabilidad mas grandi di tur parti di e comunidad.

E crisis actual di Aruba tin diferente pilar. Aruba ta ser confronta cu problemanan financiero grandi a base di e hecho cu e placa cu mester a circula na Aruba e momentonan aki pa asina sostene gastonan di Gobierno, no a bira realidad.

E rehabilitacion di e refineria no por a produci e crecemento economico pa cual gobernacion anterior a duna garantia na Aruba. Gobierno nobo mester a scrap entradanan cu tabata riba presupuesto, loke ta afecta sumanan cu Gobierno tin pa asisti riba nivel social caminda e aumento di empleo tambe a keda atras.

E posicion financiero di Gobierno a ser afecta cu e debe hereda cu causa cu na 2018 mester a tuma medidanan di austeridad pa evita cu Aruba por a enfrenta un desaster pa no menciona e palabra bancarota ya cu e debe di Aruba tabata practicamente mes halto cu loke e pais ta produci.

Den e situacion aki, refugiadonan a yega Aruba. E situacion di crisis financiero, economico y social a manifesta su mes den un crisis riba tereno di husticia, cu un aumento di criminalidad cu tin Aruba sumamente preocupa.

Falta di vivienda ta afecta e famianan. E bida basico di famia, e luga caminda muchanan ta crece y e ambiente den cual nan ta desaroya ta decisivo den hopi caso pa nan futuro y nan actitud positivo of negativo enfrente nan pais.

Tin otro factornan cu ta resalta. Edad di e ciudadanonan na Aruba ta subi. E cantidad di ciudadano di edad avansa cu no tin necesidad di stop nan participacion na actividadnan di comunidad y por biba riba nan mes na forma mas feliz, a aumenta. Nan tin e salud pa biba na nivel independiente sin forma gasto grandi pa gobierno den casnan di anciano pero ta depende di nan pensioen di behes.

Vivienda ta un di e problemanan mas grandi cu ta bin dilanti ora presenta e cuadro total di necesidadnan urgente di nos comunidad.

DIARIO como matutino cu a nace pa sostene Aruba y e Arubiano ta sigui di acerca e desaroyonan den sector di vivienda.

FCCA ta yuda den construccion y mantencion di e cas propio cu ta parti di e cultura di Aruba. Circunstancianan a haci cu un parti di e pueblo ta depende di vivienda cu nan ta huur. E sector aki ta ser hopi afecta pa e situacion social indirecto di inmigracion, cu ta aumenta e poblacion hasta na forma desconoci oficialmente. E migrantenan ta busca cu ta comparti cu otro loke ta subi e prijsnan di vivienda.

Gastonan pa construi y mantene cas priva naturalmente tambe ta subi y ta afecta e huur cu personanan cu un entrada minimo, hobennan cu ta cuminsa participa na e comunidad y ancianonan cu kier biba independiente, no por paga den hopi caso.

E casnan social di FCCA ta sumamente importante den e aspecto social di vivienda y DIARIO ta sostene e aumento continuo di casnan pagabel pa pueblo.

Nos lo sigui vigila e sector di vivienda como parti di e pakete cu pa nos ta esencial pa e felicidad di Aruba, cu ta nos compromiso.

 

 

- Advertisement -

DUNA COMENTARIO

Please enter your comment!
Please enter your name here