Home Editorial Editorial DIARIO un compromiso cu Aruba

Editorial DIARIO un compromiso cu Aruba

222
0
SHARE
- Advertisement -

Un vision no ta limita na fronteranan di loke ta visibel y existente. Na momento cu e fundado di DIARIO, Jossy Mehsen Mansur, a duna contenido na su idealismo y a  entrega Aruba e arma poderoso di su propio diario, el a percura pa continuacion di e compromiso cu el a cera cu Aruba.

E pionero di prensa Arubano a entrega na su famia e pakete di balornan necesario pa por sigui carga e responsabilidad grandi pa nan patria. Inflama pa e calor patriotico, un generacion nobo ta na timon di DIARIO na momento cu Aruba mester di e sosten periodistico pa su recuperacion y construccion di un futuro feliz.

Den cumplimento di nan tareanan mara na e compromiso cu Aruba, e directornan actual di DIARIO por conta cu respaldo di Señora Nuhad Mansur, cu a skirbi e nomber di Aruba cu letter di oro den su curason pa por a participa na e entrega total necesario pa e lucha di su pais.

DIARIO a mira luz ora Aruba tabata hiba un lucha fuerte cu hopi pais grandi a considera sumamente pretensioso di parti di un isla di su tamaño.  E bos di Aruba tabata resona pero no por a alcansa e gran proposito di libertad, mientras e tabata depende di otro pa ser scucha.

“Berdad nunca a perhudica ningun hende ningun causa ni ningun nacion”, tabata e frase cu a simbolisa e mensahe cu DIARIO a entrega na mundo cu a cera conoci cu e buskeda di dignidad di Aruba pa medio di Status Aparte.

E grito pa libertad pa un pueblo carga su propio responsabilidad pa su destino, no a bay perdi den e biento fuerte di opositornan di e lucha Arubano. DIARIO a hancra e berdad di e deseo legitimo di e pueblo den palabranan imprimi riba suela Arubano.

Awe cu Aruba mester asumi su responsabilidad propio pa su pais bou circunstancianan financiero y economico dificil, DIARIO no ta sconde berdad pa e pueblo pero ta uza berdad pa pueblo di Aruba por traha cu vision riba su recuperacion.

Durante su existencia, DIARIO mester a adapta su mes na cambionan tecnologico. Ekipo moderno, sistemanan nobo riba tereno di comunicacion, formanan nobo pa expresion ta mas efectivo.

E transicion di ayera pa awe, di un generacion pa otro, di un epoca pa otro, nunca por afecta e alma di e compromiso entre DIARIO y pueblo Arubano, intimamente conecta pa medio di e causa pa bienestar di Aruba.

Como hoben e actual Directornan di DIARIO a experencia e forsa di lucha di Aruba pa alcansa su meta grandi y sagrado. Nan a nace y crece cu e determinacion di e Arubiano pa carga Bos di Pueblo como Bos di Dios den edicionnan di DIARIO bou encargo directo di e Hefe di Redaccion Jossy E. Mansur.

Uni den un solo compromiso cu nan pais, e actual miembronan di Gerencia di DIARIO ta amplia e horizonte di vision di nan tata, Jossy M. Mansur, pa entrega e ciudadano di mañan continuacion di e historia glorioso di nan pais.

Cu orguyo nan ta mira atras riba e historia di Aruba. Nan ta duna e siguransa cu DIARIO lo sigui lucha pa e balornan, tradicionnan, cultura, idioma, caracter propio di Aruba ser preserva pa mañan nan entrega na futuro generacionnan e resultadonan di nan participacion na e lucha eterno di un Aruba feliz.

Danki Pueblo di Aruba pa e sosten. Cu bendicion di Dios acompaña nos pais semper.

- Advertisement -

DUNA COMENTARIO

Please enter your comment!
Please enter your name here