Home Editorial Editorial: Dicidi riba marihuana ora Nacionnan Uni papia!

Editorial: Dicidi riba marihuana ora Nacionnan Uni papia!

54
0
SHARE
- Advertisement -

Na entrada di dianan di fiesta y den un crisis pisa cu ta afecta e pais, legalisacion di marihuana medicinal a bira topico politico.  Mester cuestiona e momento cu a scoge pa atende e tema aki.

Sostenedonan di legalisacion di marihuana medicinal mester ta na haltura cu otro siman e Organisacion Mundial di Salud lo entrega e rapport di su expertonan cu lo sirbi pa e Comision di Narcotica di Nacionnan Uni vota riba e recomendacionnan.

Pakico na e momentonan aki kier forsa legalisacion di cannabis medicinal na Aruba na momento cu expertonan mundial di salud, cu ta conseha Aruba tambe, ta dal un paso historico pa dicidi kico mester pasa cu productonan di marihuana?

Nos a anuncia recientemente cu e Organisacion Mundial di Salud, a habri caminda pa su comision di expertonan riba tereno di droga, reuni dos siman pasa pa na un forma special traha un rapport riba Cannabis Medicinal.

Pakico Aruba no ta uza e documentonan valioso aki pa saca marihuana medicinal for di esfera politico y tuma decisionnan a base di recomendacionnan di expertonan  mundial?

E investigacion di e Organisacion Mundial pa Salud ta directamente relaciona cu e hecho cu na cantidad di pais a dicidi di legalisa marihuana medicinal cu ta keda un controversia y un responsabilidad grandi pa e bon maneho dor di gobernacion.

Tur investigacion ta demostra cu mester ta cuidadoso ora ta tuma decision cu ta marca historia.

Pakico a scoge pa awor tene un conferencia na Aruba? E personanan cu ta ser presenta como orador, no ta miembro di e comision oficial di e Organisacion Mundial di Salud cu ta autoridad mundial pa determina kico marihuana medicinal por nifica pa e pais.

Si e Comision di Narcotica di Nacionnan Uni ta uza recomendacionnan di e expertonan di Organisacion Mundial di Salud, pakico Aruba no por uza e resultadonan valioso di investigacion internacional y spera e decision di e Comision di Narcotica di Nacionnan Uni?

Aruba ta prepara pa delibera riba su presupuesto crucial pa 2019 cu ta un aña determinante pa bienestar di e pais cu na e momento aki no mester di controversia pero di responsabilidad cu ta evita conmocion.

Dentro di poco, Aruba tambe por dicidi riba marihuana medicinal a base di informacion profesional di e Organisacion Mundial di Salud.

Na momento cu un gobierno legalisa marihuana medicinal, e ta responsabel pa e abuso di leynan cu por ta resultado y e problemanan cu por tin pa salud.

Ta hustamente pa evita problema pa pueblonan, e organisacion mundial di salud a laga haci un estudio y ta incomprendibel cu awor ta bin cu un conferencia y no ta spera algun luna.

Nos ta lamenta cu na un momento cu Aruba mester di union pa por confronta dianan di fiesta afecta pa un crisis nacional, ta lansa e topico controversial.

Nos ta sugeri pa politiconan envolvi, pone bienestar di Aruba dilanti y tuma decision a base di conclusionnan di expertonan internacional, cu ya ta fungi como consehero di Gobierno di Aruba.

- Advertisement -

DUNA COMENTARIO

Please enter your comment!
Please enter your name here