Home Editorial Editorial: Futuro ta exigi incentivo pa comercio local

Editorial: Futuro ta exigi incentivo pa comercio local

32
0
SHARE
- Advertisement -

Aña 2017 a cera cu pronosticonan scur pa Aruba. Tur proyeccion tabata basa riba e problemanan grandi cu Aruba ta confronta como resultado di e crisis financiero den cual e debe nacional astronomico ta central y tambe e hecho cu CITGO no por a cumpli cu su acuerdo cu Aruba.

Na final di un aña sumamente dificil durante cual nos a haci nos maximo esfuerso pa informa comunidad di tur aspecto di e situacion cu ta afecta henter e comunidad Arubano. nos mester sigui enfatisa riba necesidad di un postura nobo enfrente comercio local den su totalidad, cu ta e dunado di trabou mas grandi di Aruba y e fuente mas grandi di entrada di e pais.

Futuro awe ta entrega e resultado di un acercamento economico den cual comercio local a perde den e panorama di companianan gigante cu a ser mira como e necesidad grandi di e pais y a ricibi cantidad di incentivo.

Comercio local a keda e sector cu a cumpli cu tur e exigencianan di economia habri democratico. E sector comercial local mester percura pa empleo y bienestar social, entrada pa gobierno y e circulacion local directo di placa.

E negligencia grandi di gobierno anterior di e prioridad comercial di Aruba, awe ta haci cu cantidad di cas comercial di Aruba ta incapaz ainda pa enfrenta e crisis cu mester a spera y cu lo empeora si gobierno actual no adopta un postura nobo enfrente comercio local.

DIARIO ya a presenta algun resultado di su trabou como matutino di Aruba,  cu a profundisa den e diversificacion economico necesario y e cambionan mundial pa cual mester a prepara Aruba.

Central den e cambionan grandi ta e hecho cu e generacion mas rico di historia moderno lo ser reemplasa dor di generacionnan mas hoben.

Comunidadnan grandi manera Merca ta ocupa nan mes cu e traspaso di bienes mas grandi den historia di paisnan liber durante e dos decadanan venidero.

Estudionan ta ser haci y cifranan importante ta base pa sigui planifica futuro comercial.

Ta ser calcula cu na Merca un suma di 68.4 Triyon Dollar ta e balor di e total di interes economico y financiero cu lo pasa di un generacion pa otro durante e proximo 25 aña.

Nos a informa riba e generacion nobo di turista cu Aruba lo ricibi y pa cual e pais mester ta prepara.

E generacion aki ta bin cu un bista nobo cu por ta sumamente positivo pa Aruba cu mester ahusta na e demanda internacional y local nobo.

Mester produci cifranan pa Aruba tocante e traspaso comercial local di e pais.

Mester prepara Aruba pa atende cu un etapa comercial mundial nobo y haci uzo di servicionan nobo specialisa den e proceso pa por adapta e pais na un realidad nobo.

E situacion di crisis actual mester ser utilisa pa crea futuro responsabel asumiendo un postura nobo enfrente comercio local.

E generacion nobo sigur por ta un inspiracion. Si e generacion cu ta despedi tabata esun di mas rico y basa riba logro individual, e profesionalnan, trahadonan y empresarionan cu awor ta subi mercado, ta amante di cooperacion.

Comercio mester ahusta su mes na demanda di e grupo nobo aki, cu a cuminsa produci su propio pioneronan. Nan ta enfrenta e reto di cadenanan grandi cu sistema moderno pa presenta productonan y aumenta benta cu innovacion creativo personal y yudansa di tecnologia.

Resultadonan sorprendente ta ser alcansa pa expertonan nobo cu ta restructura comercio local, cu mester por haci e inversionnan necesario pa yuda amplia economia. Pues mester tin incentivo pa e comerciante local tambe.

Pa supera e crisis actual Aruba mester di e brisa suave di recuperacion comercial. Pa esaki bira posibel e bista gubernamental no mester ta dirigi riba gigante den exterior pero e comerciante local cu mester ta e prome cu ta ricibi incentivo como participante principal den e construccion di futuro.

 

 

- Advertisement -

DUNA COMENTARIO

Please enter your comment!
Please enter your name here