Home Editorial Editorial: Thanksgiving: union pa yama danki y sigui lucha

Editorial: Thanksgiving: union pa yama danki y sigui lucha

28
0
SHARE
- Advertisement -

Thanksgiving ta uni nos den e conhunto mas bunita di balornan humano. Awe na Merca, caminda e celebracion a origina, famianan ta cubri distancia largo pa reuni na mesa y comparti historia y tradicion. Asina nan ta celebra y yama danki atrobe na Creador, pa loke nan a cosecha y ta comparti.

E platonan riba mesa ta simbolo di loke e suela Mericano a produci pa e Pilgrim Fathers, un grupo religioso cu a huy for di Inglatera y a bay biba na Leiden, Hulanda. Despues nan a crusa ocean Atlantico y na 1620 a bira e prome personanan cu a transforma New England den nan cas permanente nobo.

Persecucion, problema grandi, a pone nan dicidi pa bandona e situacion cu nan mester a biba aden y crea un bida completamente nobo pero cu mantencion di nan identidad, balornan, tradicionnan.

E acto di e prome colonistanan na Merca ta inspira nos pa tanto motibo. Nan fe cu nan lo logra y cu a haci cu nan a introduci un tradicion cu un dia un di e paisnan mas poderoso, lo a entrega mundo.

Ora suela a produci nan prome cuminda, adapta na loke e pais por a brinda nan, nan a hinca rudia y nan a yama danki como hende, como famia, como comunidad, como e pueblo nobo cu lo a drenta historia como Estados Unidos, Merca.

Awe cuatro siglo despues, e celebracion den un cunucu chikito na e mundo nobo, ta e fiesta cu ta paralisa bida normal na Merca. Famianan ta subi avion, trein, auto, barco, pa reuni. Awe e curason di Merca ta bati na tur nivel y na tur parti di e pais.

Awe na Merca, un di e tradicionnan mas significante pa ser celebra. Cu goso y alegria, famianan como alma di comunidad, ta yama Dios danki pa loke nan a produci, realisa, cosecha. Nan ta reforsa nan union pa sigui cana.

Sin duda tanto durante e prome Thanksgiving como awe, tur celebracion lo pone hende recorda momentonan sumamente dificil cu a experencia. Pero nan a sigui dilanti y a bira forsa historico na nan pais.

Na decada ochenta, Aruba a subi lama grandi y na un ciudad cerca di Leiden, Hulanda cu ta Den Haag, e lider Betico Croes a planta e bandera di e pais nobo cu e Conferencia di Mesa Rondo a produci.

Cantando su himno, refleha den su escudo, Aruba a sembra un futuro nobo na su idioma Papiamento den e matutino di Aruba, DIARIO cu Jossy Mehsen Mansur a introduci pa Aruba semper por topa cu su mes den su historia skirbi.

Cu futuro lo no tabata facil, e pueblo luchado di Aruba tabata sa. Ora e pueblo mester a drenta e pais nobo, su fuente di entrada cu tabata Lago, a cera su porta.

Thanksgiving 1985 a mira Aruba ta comparti loke e tabata tin den un Teleton.

Den dolor Aruba a acepta Status Aparte di Aruba. Na momento cu Arubianonan tabata para riba suela di e pais nobo, e lider di nan lucha, Betico Croes, tabata lucha pa su bida y nunca a gosa di e logro cu el a entrega su patria.

Awe Aruba ta para dilanti reto grandi. E tin un problema cu su cosecha. Aruba mester prepara su cunucu pa un cosecha nobo.

Ta na e momento aki e palabranan di e lider cu a hiba e pais Aruba na e logro di Status Aparte,  ta resona: Coy bo bandera y sigui lucha!

Awe Dia di Thanksgiving Betico Croes, un homber di fe ta duna animo na su pueblo den e matutino cu a uni Arubianonan.

Como e matutino di Aruba cu a skirbi e historia di e pais nobo, awe DIARIO ta invita Aruba pa nos uza Thanksgiving pa uni y yama danki. Pa nos haya forsa y cu fe hisa nos bandera y sigui lucha. Hunto, cu bendicion di Dios, nos lo yega na un cosecha nobo.

 

 

- Advertisement -

DUNA COMENTARIO

Please enter your comment!
Please enter your name here