Home General ELMAR tin varios reto y awor mester haci un evaluacion di tur...

ELMAR tin varios reto y awor mester haci un evaluacion di tur cos cu a keda pendiente

67
0
SHARE
- Advertisement -

Ing. Tico Koolman, director

ORANJESTAD (AAN): Diamars a bira conoci cu entrante 1 December 2018, Ing. Albertico B.F. Koolman (Tico) lo ta temporalmente encarga cu e maneho di Elmar N.V.

Den entrevista cu DIARIO Albertico Koolman a duna di conoce cu tin varios reto nan dilanti. Aworaki ta bay bin un temporada unda mester bay evalua tur cos cu a keda pendiente.

Elmar kier pa tin trankilidad den e compania, a remarca, y mirando e retonan cu ta bay bin, mester pone tur cos riba papel pa cuminza traha un plan di accion concreto.

CAO  

Segun Koolman, e trahadornan tabata boga pa un CAO nobo. Esnan cu tin CAO caba, esey ta bay caduca na 2020, pero tabata tin algun problema y tabata desea un CAO nobo.

Pa awor, mester bay sinta cu e trahadornan y wak kico nan ta pidiendo y mira ki espacio tin pa analiza con ta bay cuminza cu esey, el a agrega.Tin hopi cos pareu cu mester tuma lugar y cu mester duna prioridad y wak cual ta bay prome.

Pa loke ta e retonan, a manifesta cu e reto mas grandi ta keda e CAO cu ta caduca 2020 y pa esey mester cuminza prepara caba na 2019. “Nos kier cera un CAO pa un temporada largo, pa tin un ‘arbeidrust’ den e compania tambe y pa asina nos por haci nos trabaonan”, e ehecutivo di ELMAR a expresa.

STORING 

Tico Koolman a subraya cu un di su preocupacionnan ta cu semper tabata tin storings, pero banda di esaki tin hopi trabao di mantencion cu mester bin. Esey ta algo primordial cu mester cuminza traha riba dje. Mantencion ta tumando lugar, pero tin areanan cu merece un tiki mas atencion y dedica mas tempo na nan.

El a indica cu tin areanan na Aruba unda ainda tin lineanan ariba tera y ora cu tin yobida, lamper, semper esaki ta e areanan cu ta confronta problema y ta perde coriente. Areanan cu ta hopi cerca di lama y cu mester mas atencion, nan lo duna e atencion cu merece.

LUZNAN DI CAYA

Pa loke ta e luznan di caya a bisa cu un par di aña atras a cambia tur e luznan di caya. A pone un luz smart y esaki ta comunica internamente via un sistema cu ELMAR cu e tecniconan mes por wak cual ta cendi y cual ta paga. Pero a haya problema cu e luznan oranje, na e cruzadanan.

Siman pasa e compania a bin di Canada pa certifica un par di trahador di ELMAR. Actualmente nan ta bezig cambiando tur e luznan cu ta paga pa esunnan oranje, a indica. Si aworaki tin luznan paga, ELMAR ta bezig cambiando nan.

E lugarnan cu no tin luz ainda, esey ta un otro proceso, a remarca. Esey ta bay via DTI y ora cu ELMAR haya ok di gobierno, lo pone e luznan aki tambe.

E sistema bieu a wordo cambia pa e sistema LED, cual ta saca mas luz of mas iluminacion compara cu esun bieu, Tico Koolman a señala.

FINANZAS

E situacion financiero ta un di e partinan cu mester bay analiza. Pero te ainda ta cumpliendo bon. No tin problema cu esey, a bisa.

Koolman a finaliza bisando cu eta sinti cu e trahadornan di ELMAR ta para su tras y hunto lo tin cu zorg pa tin un compania sano.

- Advertisement -

DUNA COMENTARIO

Please enter your comment!
Please enter your name here