Home General Entrega di certificado di training BRA-100 y Carib Wave 2018

Entrega di certificado di training BRA-100 y Carib Wave 2018

20
0
SHARE
- Advertisement -

ORANJESTAD (AAN): Diamars 6 di november tabata dia di reflexion di Tsunami. Apesar cu na Aruba no ta costumbra cu e fenomeno aki, toch esaki ta un peliger eminente pa Aruba, segun hefe di e Departamento di Rampenbestrijding, Rino Hermans.

Bureau RampenBestrijding Aruba a organisa e training di BRA-100 y Carib Wave 2018 pa trece concientizacion pa cualkier tipo di calamidad. En total, 37 participante a completa e curso ‘Carib Wave 2018’. Esaki ta un cantidad record pa participacion pero esaki no ta suficiente, segun Prome Minister Evelyn Wever-Croes, kende tawata presente na e celebracion di certificado di e grupo cu a pasa e curso exitosamente dialuna ultimo.

“Na momento cu boso ricibi e certificado, bo ta keda tambe cu un compromiso pa bo yuda nos pa envolve mas hende pa nan ta mas conciente di e importancia di e tipo di cursonan aki”.

Na e curso a participa personanan cu ta pertenece na e aparato gubernamental como tambe na sector priva. Ta di elogia tambe cu e participacion di e sector turistico a crece. Como Turismo ta nos pilar economico, ta importante pa mira cu e parti di e sector di Turismo tey tambe pa e concientizacion pa cu e tipo di calamidadnan aki. Miho prepara nos isla ta, miho nos por atende cualkier crisis cu toca nos.

E unico scol cu a participa na Carib Wave 2018 tabata Rosario College. Prome Minister a gradici e cabesante sra. Monique Trapenberg pa su participacion. Na mes momento, e mandatario principal di nos pais a duna di conoce cu lo trece e punto aki den conseho di Minister pa asina stimula scolnan pa participa na trainingnan asina. Si cuminsa siña e muchanan e base, nos ta brinda informacion na dos generacion na e mesun tempo. Pasobra e muchanan lo bay cas y pasa e informacion ricibi na nan mayornan tambe.

Prensa tambe a participa mas activamente na Carib Wave 2018 mustrando asina e rol importante cu prensa tin pa informa e comunidad debidamente riba no solamente e trainingnan sino tambe e preparacionnan pa e efectonan di e tipo di calamidadnan cu por presenta.

Prome Minister: “Mi ta kere cu e trainingnan aki ta sumamente necesario pasobra na prome luga ta duna e conocemento pa con actua den casonan asina, y mas ainda e ta duna evaluacion y ta mustra unda bo no ta cla ainda y unda mester di mas preparacion cu por evita impacto di cualkier calamidad cu por ta devastador”.

Prome Minister a gradici Bureau RampenBestrijding Aruba, Meteo, personal y hefenan di tur e organisacionnan gubernamental y no gubernamental y tur otro cu a participa na e curso. Ta spera cu esaki por sirbi como un motivacion pa demas organisacionnan, departamento y instancianan. Informacionnan lo wordo duna pa e siguiente curso di Carib Wave cu lo ta dia 14 di maart 2019. Pabien na tur cu a pasa e curso Carib Wave 2018 cu exito.

 

- Advertisement -

DUNA COMENTARIO

Please enter your comment!
Please enter your name here