Home Hudicial Fiscal a pidi 8 aña di prison pa homber cu a abusa...

Fiscal a pidi 8 aña di prison pa homber cu a abusa di 2 yiu muher y saca un na estado

7401
0
SHARE
- Advertisement -

ORANJESTAD (AAN): Diabierna mainta den Corte di Husticia a trata un lamentable y horibel caso caminda e homber R. durante 4 pa 5 aña largo a abusa di su dos yiunan menor di edad y a saca un di e muchanan na estado. E caso aki a bin na claridad ora cu e mucha a sali na estado y ni e mama tabata sa di e abusonan cu tabata tuma lugar.

Pa colmo psychiater a constata cu R. no ta completo responsabel pa su actonan. Fiscal, teniendo e raport di psychiater y Reclasering na cuenta, a dicidi di exigi 8 aña di prison. Su intension tabata pa exigi 10 aña.

ABUSO SEXUAL:

E acusacionnan contra e homber R. ta cu entre 2013 y 2018 el a tene relacion sexual cu su mesun yiunan cu tabata bou di 16 y 12 aña. Ta asina cu mama di e muchanan tabata presente den sala di Corte y e sospechoso R. a admiti tur cos.

Tabata hopi dolor pa e mama pa scucha con R. tabata abusa di su yiunan muher.

E sospechoso R. a cuminsa abusa un di e muchanan tempo e tabatin 10 aña mientras cu e otro el a cuminsa abusa di dje tempo e tabatin entre 11 y 12 aña.

Durante tratamento di e caso a sali na cla, cu e homber R. hasta  bay cu e muchanan Venezuela y tabata abusa di nan aya tambe.

Aki R. a bisa Hues cu e ta “un alcoholico” y ora e ta bebe y bira burachi, e ta haci cosnan cu e no mester haci. El a bisa cu e kier ayudo.

NO TA COMPLETO RESPONSABEL PA SU ACTONAN:

Hues a mustra cu tin un raport di psychiater cu ta mustra cu R. tin un educacion hopi abou y e no ta realisa cu loke el a haci ta hopi malo pa cu e muchanan.

Psychiater ta conclui cu R. no ta completo responsabel pa su actonan.

MACHISTA Y ABUSA DI SU YIUNAN:

Hues a cuestiona R. pa cu su comportacion machista y a mustra cu R. no ta realisa con el a afecta su mesun yiunan pa resto di nan bida.

  1. no tabata permiti su yiunan sali y ningun hende bin cerca su yiunan. Durante e periodo largo di 2015 y 2018, e tabata haci actonan inmoral cu su yiunan y tabata tene relacion sexual cu nan sin usa proteccion.

A sali na cla cu R., varios biaha pa siman tabata abusa di su dos yiunan den tur forma. Masha horibel mes. Den Corte el a hasta confesa na Hues cosnan baho cu e tabata haci cu su propio yiunan cu ni na Polis el a bisa.

SACA YIU NA ESTADO:

Tur e abusonan aki a causa cu un di e muchanan a sali na estado. E mama, un persona cu ta traha duro pa su yiunan, a haya un sla duro ora el a haya sa di e incest, y cu un di su yiunan a sali na estado door di R.

E mama no por a kere cu R., cu un actitud machista, cu no tabata laga e yiunan sali, tabata abusa di nan yiunan.

Hues ta haya cu R. a abusa di e confianza cu su yiunan muher tabatin den dje, como tata.

MUCHANAN BOU TRATAMENTO:

Hues a mustra cu awor e muchanan, victima di abuso di nan propio tata, lo keda afecta pa resto di nan bida. Ta asina cu e muchanan ta bao tratamento actualmente.

Hues a bisa cu Reclasering den su raport ta mustra cu R. mester di tratamento tambe pasobra e chens cu e lo bolbe haci algo horibel asina, ta hopi grandi.

EXIGENCIA DI FISCAL:

Fiscal a condena totalmente e forma horibel con R. tabata abusa di su mesun yiunan muher durante 4 pa 5 aña. Fiscal a bisa Hues cu e tabatin pensa pa exigi 10 aña di prison.

Sinembargo, teniendo cuenta cu e raport di psychiater cu ta mustra cu R. no ta completo responsabel pa su actonan y tambe e raport di Reclasering cu ta mustra riba e peliger cu R. lo por bolbe haci algo horibel asina, el a exigi 8 aña di prison, kitando e tempo cu R. ta sera den KIA.

Hues a bisa cu e ta bay studia e caso y dia 7 December 2018 lo por spera sentencia.

 

- Advertisement -

DUNA COMENTARIO

Please enter your comment!
Please enter your name here