Home Gobierno Gobierno kier crea un “Ouderenraad” pa Aruba pa mehora calidad di bida...

Gobierno kier crea un “Ouderenraad” pa Aruba pa mehora calidad di bida di grandinan

22
0
SHARE
- Advertisement -

ORANJESTAD (AAN): Un grupo cu ta vulnerabel den comunidad cu mester haya atencion ta nos grandinan. Cuido di nos grandinan ta un prioridad halto pa Gabinete Wever-Croes. Prome Minister Evelyn Wever-Croes a expresa cu Gobierno tin preocupacion pa e cuido di nos grandinan.

E motibonan di preocupacion ta encera abuso fisico di nos grandinan, descuido, malnutricion y negligencia di famia y of nan cuidadonan. Cuido di salud tambe ta un punto di preocupacion. Hopi biaha ta e caso cu nos hendenan grandi no ta worde tuma mucho na serio ora nan yega nan doctor. Hopi biaha nan ta haya como contesta cu loke nan ta padece ta simplemente biehes y cu nan mester siña biba cu tur e sintomanan di biehes. Sinembargo esaki no semper ta e caso.

Un otro punto di preocupacion ta cu nos grandinan no tin suficiente participacion apesar cu tin hopi hende den nos comunidad cu tin 60 aña of mas cu ainda ta hopi activo. Esaki, segun Prome Minister ta un lastima cu nan ta sali for di e mercado laboral hibando tur nan conocemento y experticio y nos pais ya no ta haci uzo di nan.

Den e programa di Gobernacion tin un maneho pa introduci un ‘Ouderenraad’, un conseho di hendenan mayor. Esaki por worde compara cu ‘Social Economische Raad’, SER. SER ta un instituto ancra den ley pa duna Gobierno conseho sea cu Gobierno ta pidi e conseho of no riba tur tema di asuntonan social y economico. Un ehempel di esaki ta cu si Gobierno dicidi di hisa salario minimo, e mester bay cu e decision aki SER prome.

E ‘Ouderenraad lo funciona di mesun manera. Nan lo haya e tarea pa duna conseho na Gobierno sea Gobierno pidi of no basa especificamente riba con pa mehora calidad di bida di nos grandinan.

“Loke nan ta yama ‘vergrijzing’ como un problematica, pa mi e no ta un problema sino mas bien un desaroyo den bida hopi bunita ora cu ciudadanonan yega na un edad halto. Gobierno kier duna mas participacion na tur esnan cu a yega na un edad bunita y cu por y kier contribui na bienestar di nos pais”, Prome Minister Evelyn Wever-Croes a enfatisa.

- Advertisement -

DUNA COMENTARIO

Please enter your comment!
Please enter your name here