Home Gobierno Gobierno lo ofrece pakete obligatorio pa esnan den “overtolligheidspoel”

Gobierno lo ofrece pakete obligatorio pa esnan den “overtolligheidspoel”

305
0
SHARE
- Advertisement -

No ta husto pa pueblo sigui paga pa esnan cu ta na cas y keda cobra

ORANJESTAD  (AAN):  Gobierno a tuma pasonan concreto pa yega na solucionnan cu ta realisabel pa asina drecha e situacion financiero di nos pais. Gasto di personal ta un reto grandi cu Gabinete Wever-Croes a hereda despues di 8 aña di acumulacion di mal desicionnan y maneho di e gobierno anterior cu a resulta den retonan sumamente penoso pa nos pais.

Den e cuadro aki, Prome Minister Evelyn Wever-Croes a anuncia e decision di Ministerraad tocante overtolligheidspoel. Actualmente tin un cantidad di mas o menos 50 persona cu ta na cas cu diferente motibo y tempo. Algun di e hendenan aki ta na cas pa hopi aña caba sin yega na trabou mientras nan ta cobra nan salario. Algun di e personanan aki, nan departamento a wordo reorganisa y nan funcion no tabata necesario mas. Y enbes di busca solucion pa nan, nan a wordo manda cas. Otronan ta na cas pa motibo di persecucion politico y no a sinti pa traha bek.

E overtolligheidspoel ta un reto enorme cu ta costa Gobierno un total di 7 miyon florin pa aña. Prome Minister a enfatisa cu Gobierno no por sigui carga esaki mas. Entrante prome di januari 2019 lo bay brinda tur esnan cu ta den overtolligheidspoel un pakete obligatorio. E oferta aki ta mescos cu e pakete di VUT cu ta pone cu nan lo haya algun aña di salario so mas. Gobierno ta duna 6 luna di tempo pa yega na un funcion den Gobierno cu nan por ocupa a base di nan cualificacionnan y e gana cu nan tin pa traha. E proceso lo bay den un forma di guia individual. Den caso cu e persona no kier eherce e funcion habri, e por pidi su retiro voluntario y no lo keda Gobierno otro cu kibra e relacion di trabou cu ne.

“Esaki nos ta haci pasobra ta hopi importante pa baha e gastonan di personal. No ta husto cu e comunidad henter mester paga pa e gastonan personal di Gobierno debi na personanan cu ta na cas den overtolligheidspoel”, Prome Minister Evelyn Wever-Croes a duna di conoce.

 

 

 

 

 

- Advertisement -

DUNA COMENTARIO

Please enter your comment!
Please enter your name here