ORANJESTAD (AAN) – Como di dos tema, den conferencia di prensa yama pa Minister di Husticia mr. Andin Bikker, el a papia den e mesun ambito di e opositornan politico, pero den e contexto di RST Protocol y kico exactamente ta tumando lugar.
Minister Bikker a expresa cu nan kier trece un luz negativo riba e protocol di RST, cu aworaki gobierno ta bezig papiando cu otro partnernan di Reino pa por yega na un RST Protocol.
E mandatario, pa pone tur cos den contexto, a expresa lo siguiente: “No ta Andin Bikker a pidi pa bay evalua RST Protocol. Sr. Arthur Dowers, na Januari 2017, diripiente a bin cu e idea cu mester bay evalua RST.
Ni Hulanda, ni Corsow, ni Sint Maarten a bin cu e idea. Sr. Arthur Dowers a bin cu e idea pa evalua e RST Protocol cu ta data di 2002. Na Januari el a lague colga y mi a asumi e responsabilidad, bay Parlamento pidi un mandato hopi estricto, pa bisa ‘tende aki, nos lo studia e asunto aki, e no tin mag di touch nos autonomia.
Nos a keda encarga y asina nos a yega na un acuerdo cu Hulanda, cu ta bay bin un concepto di protocol nobo”.
Minister Bikker a sigui bisa cu, en todo caso, prome cu fin di Januari, e concepto aki lo bay den Parlamento di un pa dos siman di tempo, pa Parlamento duna su comentarionan. “Si nos tin mandato di Parlamento, nos lo bay di acuerdo cu e protocol. Si no tin mandato no tin protocol”, Minister di Husticia a subraya.
KICO E PROTOCOL TA ENCERA?
Minister a splica cu e protocol ta encera cu di 2002 bin ariba, Aruba, KPA, Ministerio Publico, nos institutonan y Landsrecherche, tin disponibilidad di capacitacion specializa.
“Pues, ora tin casonan hopi complica cu no tin suficiente experticia aki na Aruba, of na Corsow, of na Sint Maarten, Hulanda ta pone recherchenan experto disponible pa haci onderzoek na casonan complica, y esey ta na interes general pa mantene nos leynan, y cu esey no solamente e homber chikito cu a touch algo cu no ta di dje, pero esnan cu ta bisti bachi cu dashi, ora nan comete algo cu nan ta bay den un structura hopi complica, pa nan tambe e ley ta conta, pasobra ningun hende ta para riba ley”. Asina minister Bikker a expresa.
Esey ta e esencia di e samenwerkings team. E minister a bisa acerca cu esaki ta un protocol y si un dia un isla bisa cu e no kier samenwerking mas e no ta wordo prolonga, of e por bisa cu te tal fecha e kier cooperacion.
“Den e caso aki pesey nos ta sinta na mesa. E concepto lo wordo manda Parlamento pa nan duna comentario, despues ta bay Ministerraad cune”, el a splica.
E mandatario a desmenti loke oposicion a saca den medionan di prensa cu RST ta bay tuma cierto departamentonan di KPA. “E no ta berdad, nunca a pasa y no ta bay pasa tampoco”, Minister Bikker a señala.
