Home Turismo ‘Grand Central Station’ na New York tur na Aruba

‘Grand Central Station’ na New York tur na Aruba

375
0
SHARE
- Advertisement -

A.T.A. a lansa campaña ‘Authentic Aruba’

ORANJESTAD (AAN)–– Siman cu a pasa, Aruba Tourism Authority (A.T.A.) a lansa e campaña nobo ‘Authentic Aruba’. Esaki a tuma luga na ‘Grand Central Station’ na New York unda Aruba a ‘take over’ e sitio iconico aki pa luna di november. Riba mas cu 150 borchinan grandi por mira ilustracionnan di e campaña unda varios di nos localnan ta conta dicon Aruba ta asina special.

Na ‘The Campbell Terrace’ den ‘Grand Central Station’, CEO di A.T.A. Ronella Tjin Asjoe-Croes, CEO di Aruba Hotel and Tourism Association (AHATA) Tisa La Sorte, Sanju Luidens-Daryanani CMO di A.T.A., Ed Malone Director di A.T.A. pa Norte America, otro integrantenan di e ekipo di A.T.A., y esnan clave pa e anochi aki -kende ta varios di nos localnan cu ta forma parti di e campaña- a yama tur hende bonbini.

Esnan presente tabata e pareha ehemplar y feliz Lilian y Roque Pieters, artista Vanessa Paulina, carnavalistanan Irina Croes y Lisette Schnog, y nos campeon di windsurfing Sarah-Quita Offringa. A comenta entre otro cu e anochi ta extra special considerando e conexion entre Aruba y New York; mas tanto hende di e area di New York ta bishita Aruba, cu for di cualkier otro luga di mundo.

Esaki ta haci e importancia di y e gratitud na e area aki uno grandi. Entre e obhetivonan di A.T.A. ta tambe, pa hala atencion di personanan afluyente for di area di Connecticut y Metro North/Westchester, cu ta pasa tur dia na ‘Grand Central Station’ pa yega New York City.

Diferente ‘influencers’ y medionan di prensa, entre nan di e revistanan ‘Men’s Journal’, ‘Cosmopolitan’, ‘Good Housekeeping’, ‘New York Post’, ‘USA Today’, ‘The Oprah Magazine’, ‘Travel & Leisure’, Matador Network y mucho mas tabata presente pa e ocasion aki.

Adicionalmente A.T.A. ta activando promocion di ‘Authentic Aruba’ atrabes di Instagram cu un cuenta yama ‘expresstolocalaruba’. Mas cu claro ‘Authentic Aruba’ lo sigui wordo uza pa promove Aruba pa medio di tur canal di promocion. Mester remarca cu e campaña lo mustra hopi mas personahenan di Aruba kende na su debido momento lo wordo lansa. Promocion na Europa y Latino America tambe lo inclui aspectonan di ‘Authentic Aruba’.

A.T.A. ta gradici Ritz Carlton Aruba y Red Sail Sport pa nan aporte pa cu ‘expresstolocalaruba’ cu ta mara na e activacion na ‘Grand Central Station’. Tambe ta gradici nos ‘embahadornan local’ Sarah-Quita, Irina, Lisette, Vanessa y Lilian cu Roque kendenan a haci un trabou fantastico pa asina hunto cu A.T.A. y AHATA promociona Aruba debidamente. A.T.A. ta masha satisfecho cu e evento y principalmente cu Aruba su dominion di ‘Grand Central Station’ den luna di november.

- Advertisement -

DUNA COMENTARIO

Please enter your comment!
Please enter your name here