ORANJESTAD (AAN): Riba e potret aki por mira momento cu Davie Bisslik ta rek su man di orguyo y satisfaccion, despues di a caba di landa pa 8 ora largo di Venezuela pa Aruba, y aki ta yegando net na cas di su tata Roly Bisslik. Esaki en conexion cu e hazaña di Crossing for Hope.
En total cinco atleta, esta Davie Bisslick, Wendy Kock, Romar Arendsz, Deaxo Croes, y Stephan Thijsen a cruza 30 kilometer landando di Puerto Escondido (Venezuela) te na Savaneta (Aruba). Un publico di riba 2.000 hende tabata presente pa duna nan bon bini, cu grito y apoyo sin igual. Riba pagina 24 por lesa mas di esaki.
Algun ciudadano a keda asombra cu ningun Ministro tabata presente na yegada di e atletanan hoben aki. E ciudadano Juan Eloy de Cuba di Savaneta, a nota cu Parlamentario Ady Thijsen si tabata presente. Pero ningun gobernante mas, ni Ministro di Deporte no tabata presente. Di con a laga Savaneta, e prome capital di Aruba na caya? Di con no por a manda ni un representante pa duna cara, y rindi honor na e atletanan aki.
“Mi ta realmente lamenta cu ningun Ministro no a show up pa e gran evento aki,” Juan Eloy de Cuba a indica.
