Home Labor Haya sa bo derechonan ora bo wordo retira ‘op staande voet’

Haya sa bo derechonan ora bo wordo retira ‘op staande voet’

1169
0
SHARE
- Advertisement -

Plataforma Hobennan Profesional:

ORANJESTAD (AAN): Un trahado por worde confronta cu e situacion unda cu e ta worde retira inmediatamente pa causa di un motibo urgente (dringende reden).

Esaki por tin como consecuencia cu e relacion laboral entre dunador di trabao y trahado ta termina al instante. Ta importante pa e dunador di trabao ta na altura cu tin leynan cu ta aplicabel riba e scenarionan aki. PHP a tuma nota cu retiro ‘op staande voet’ ta sosode cu hopi frecuencia. Pa e motibo aki, nan lo elabora den liñanan grandi tocante e topico en cuestion.

Na momento cu e dunador di trabao termina e relacion laboral cu su trahador al instante, esaki por tin consecuencia devastador pa e trahado. E trahado por keda den un posicion vulnerabel financieramente y cu stress emocional.

Pa e motibo aki, retiro a causa di un motibo urgente ta regla den ley.  Articulo 7A:1615O inciso 1 di nos codigo civil ta menciona tres criteria importante.

Principalmente mester tin: (1) Un motibo urgente (dringende reden) pa retira e trahado; (2) E trahado concerni, mester worde avisa di biaha tocante e motibo di retiro;  (3) E retiro mester sosode di forma inmediato.

Un motibo urgente (dringende reden) den sentido di articulo 7A:1615 P, ta un accion, cualidad of conducta di e trahador, cu tin como consecuencia cu no por exigi di e dunador di trabao pa continua e relacion laboral. Articulo 7A:1615P inciso 2 ta menciona un lista no limitativo di motibonan urgente cu por resulta den un retiro al instante.

Motibonan cu por worde considera urgente segun ley ta entre otro:

  • na momento cu un trahado maltrata su coleganan of dunador di trabao;
  • na momento cu un trahado descuida su obligacionan laboral na un manera inaceptabel;
  • na momento cu e trahado haci su mes culpabel di ladronicia na pia di trabao;
  • na momento cu un trahado intencionalmente ta expone su mes y otro nan na peliger na pia di trabao;
  • Na momento cu e trahador no ta apto pa, ni capacita pa eherce su trabao.

Tur e loke a caba di menciona por worde considera como motibonan urgente pa retira e trahado inmediatamente. Nos kier enfatisa cu e circumstancianan specifico di e caso ta determina si tin un motibo urgente pa retira e trahado inmediatamente.

E trahado concerni, mester worde avisa di biaha tocante e motibo di retiro

E dunador di trabao ta obliga pa avisa e trahado tocante e motibo di su retiro al instante. Esaki por sosode verbalmente of por escrito(por ehempel un carta formal). Si esaki sosode por escrito, e carta mester ta di tal manera formula cu e trahado por compronde kico te motibo pa su retiro inmediato. Esaki ta duna e trahado e oportunidad pa por evalua si locual e ta worde acusa di dje ta corecto. Ta importante pa e dunador di trabao ta conciente cu unabes e avisa e trahador tocante e motibo di su retiro al instante, esaki no por worde ahusta of añadi mas motibo.

E retiro mester sosode inmediatamente.

Dunador di trabao mester retira e trahador inmediatamente, despues di e incidente of accion di e trahador. Si e dunador di trabao laga dia(nan) transcuri esaki por duna un indicacion cu e motibo no ta urgente. Den bista di Corte di casacion e ta aceptabel cu e dunador di trabao por tuma algun dia pa haci e investigacionnan necesario of adkeri conseho huridico pa asina e por tuma un decision responsabel y correcto .

Otro factornan determinante relaciona cu retiro ‘op staande voet’

Den e caso Hema, Corte Supremo a subraya cu tin otro aspectonan cualnan tambe mester worde tuma bou consideracion ora ta trata di un retiro op staande voet. ‘Pa evalua e pregunta si por papia di un motibo urgente pa retiro inmediato mester considera e circumstancianan di e caso en combinacion cu circumstancianan personal. Bou di e circumstancianan personal aki por cai entre otro e persona su edad y e consecuencianan cu e retiro por tin pa e trahado (por ehempel consecuencianan financiero) ‘

Plataforma pa Hobennan Professional (PHP) ta spera di por a informa e dunador di trabao y trahado un poco mas tocante e tema aki. Den nos comunidad ‘retiro op staande voet’ ta sosode cu demasiado frecuencia. E dunador di trabao mester ta mas cauteloso na momento di retira su trahador inmediatamente a causa di un motibo urgente. Den ley tin tres criteria ankra cu e dunador di trabao mester tene na cuenta prome cu tuma e decision pa retira e trahador inmediatamente a causa di un motibo urgente ( dringende reden). Si acaso e criteria nan menciona no worde teni na cuenta, esaki tin consequencia legal pa e dunador di trabao. Logicamente cada caso ta depende di nan circumstancianan specific. Ta recomendabel pa tur dunador di trabao pa busca conseho huridico prome cu tuma e decision drastico di retira e trahador al instante.

PHP kier recorda comunidad cu nan tey cu “Tienda di Ley”, tur diasabra na Cas di Partido AVP pa informa pueblo tocante temanan manera esaki y hopi mas.

E articulo aki ta skirbi pa studiantenan 3er aña di Facultad di Derecho na Universidad di Aruba.  Autor: Wendrick Cicilia, y Co-autor: Gerick Croes.

 

- Advertisement -

DUNA COMENTARIO

Please enter your comment!
Please enter your name here