Home Evenemento “Hospice Atardi” un realidad despues di varios aña di preparacion

“Hospice Atardi” un realidad despues di varios aña di preparacion

592
0
SHARE
- Advertisement -

Gobernador Boekhoudt:  “Vale la pena inverti den nos sernan keri, aunke nan ta den e atardi di nan bida”

ORANJESTAD (AAN):  Den e ultimo decadanan, e cuido den hospicenan a bira hopi importante riba tereno di salubridad publico rond mundo.

Na Corsow y na Bonaire tin hospicenan caba y esaki ta un gran logro pa loke ta e cuido paliativo, cuido di hospice. Cuido di hospice ta encera cuido paliativo durante e ultimo fase di bida unda ta pone enfasis riba ‘comfort’. E cuido di hospice ta inclui famia tambe. Asina ta realisa cuido holistico cu ta encera e parti fisico, psicologico, social, y tambe spiritual.

Na Aruba, e promer hospice “Hospice Atardi” porfin ta bira realidad despues di hopi aña di preparacion.

Pa celebra esaki, Diasabra atardi a tene un ceremonia na Hospice Atardi na su localidad na Noord Cura Cabai 147 cu presencia di Señor Gobernador Alfonso Boekhoudt, Director Medico di AZV, Dr. Joost Samuel, Coordinador Regional di Caribe pa Cruz Cora Hulanda Marion van de Rijde, Presidente di Hospice Atardi Dr. Peter Paul Hermans, demas miembronan di directiva, boluntarionan y invitadonan special. 

Cu e ceremonia aki a duna inicio oficial na e bunita proyecto aki cu a cuminsa cu un soño, e soño di Dr. Peter Paul Hermans cu awe a bira un realidad.
Peter Paul Hermans ta un dokter di cas pensiona y e ta un di e motornan tras di Fundacion Hospice Atardi. 

Hermans a cuminsa cu e idea di lanta un Hospice na Aruba cuater aña pasa. E meta di e proyecto aki ta pa brinda un bon calidad di cuido paliativo na pashentnan den fase terminal di nan bida, y cu no por wordo yuda suficientemente na nan cas. Pero kico ta cuido paliativo?  Esaki ta e cuido duna na personanan cu tin un maleza cu por causa nan morto. No ta un cuido enfoca riba cura, pero si riba reduci e sufrimento y e por cuminsa na un etapa tempran, banda di e cuido curativo. A pesar cu e pashentnan aki por acudi na hospital pa ricibi cuido curativo, un hospice ta un opcion pa un persona cu tin mester di cuido paliativo.

Na Hospice Atardi tin un team di enfermero/dokter/boluntario cu ta traha hunto pa haci esaki posibel. E intencion ta pa ofrece e persona un miho calidad di bida posibel den su situacion, cu e posibilidad di sinti nan mes na cas y cu nan sernan keri mas cerca di nan.

A keda demostra cu pa medio di cuido paliativo por hisa e calidad di bida y por resulta hasta den bida mas largo.

Gobernador Alfonso Boekhoudt, durante su discurso, a manifesta cu esaki ta un proyecto masha noble mes. “E ta noble na momento cu bo ta realiza cu nos ta den e atardi di e bida di un hende, cu nos ta bay enfoca riba su calidad di bida”.

El a agrega cu e pensamento tras di un hospice ta exactamente pa haci tur esfuerzo cu ta posible pa hisa e calidad di bida. No ta importa con largo mas, pero pa e calidad di bida ta mas miho cu ta posible.

Segun Gobernador Boekhoudt, vale la pena inverti den nos sernan keri, aunke nan ta den e atardi di nan bida. El a finaliza bisando cu e ta hopi contento di por tabata invita pa e apertura oficial. Conhuntamente cu Dr. Peter Paul Hermans, el a devela logo di Hospice Atardi y a corta e cinta dunando inicio na e proyecto Hospice Atardi.

- Advertisement -

DUNA COMENTARIO

Please enter your comment!
Please enter your name here