ORANJESTAD(AAN): Tin biaha un cliente ta djis pone su persoonsnummer y ta manda e suma cu nan debe pa Departamento di Impuesto DIMP. Den e caso aki ta papia di clientenan cu ta paga via banco.
Ora cu ricibi e statement di banco, no por wak riba ki belasting e cliente a paga exactamente segun Meverly Romano cu ta voceru di DIMP. No por wak si el a paga su grondbelasting, riba su BBO, riba su loonbelasting, riba su erfpacht.
Den e sistema por tin diferente debe habri y no sa riba ki tipo di belasting e cobransa mester bay procesa e pago ey.
E tipo di pagonan ey ta keda den nan sistema, colga. Ta yama nan vage betaling. Ta pagonan cu a wordo haci, pero no sa na unda registra nan. Riba cua cobransa nan wordo registra. Esey tambe ta un di e kehonan cu ta haya masha hopi cu e cliente ta bisa cu el a haci e pago, a haci’e tal dia y na tempo. Pero e datonan cu a ricibi no ta suficiente pa determina riba cua cobransa e persona a paga.
Pesey tambe ta pidi clientenan, vooral esnan cu ta paga via banco, pa ora haci e pago, percura pa usa e formulario corecto. E formulario di e periodo corecto cu e ta pagando. E formulario ey ta contene e referencia di pago corecto. E betalingskenmerk cu ta geprint riba e papel.
Tambe ta pidi e persoonsnummer corecto y tambe menciona ki periodo y ki tipo di belasting ta pagando. Ta detayenan hopi importante. Awor aki tin basta pago cu e sosode cu ta categorisa nan como vage betaling. E pagonan aki, berdad a ricibi nan, pero ainda no a registr’e riba cua cobransa e mester wordo paga.
Si e cliente a haci un vage betaling y su intension ta pa el a paga riba su BBO, pero no por sa riba cua belasting tin cu boek’e, kico ta bay pasa cu su BBO di e luna cu a pasa ey. Na e momentonan aki por ehempel, luna di October ta e ultimo cu mester a wordo paga. E pago di luna di October 2018 no a pasa. Kico ta pasa, ta cu e cliente aki lo bay haya un naheffingsaanslag despues.
E ta keda cu un debe habri cu no tin ningun pago registra riba dje. P’esey tambe ta hopi importante pa tene na cuenta cu ora ta haci pago online, pa e detayenan cu mester duna, semper pensa cu esun cu ta bay ricibi of traha cu e statement di banco, mester por wak ken a paga, kico ta su persoonsnummer, riba cua periodo el a paga y cua ta su betalingskenmerk e ta pagando. Ta detayenan importante. DIMP tambe kier evita pa manda naheffingsaanslag cada rato pa e cliente.
Na e momentonan aki tin un volumen masha grandi di naheffing cu ta saliendo. E ta costa gobierno tambe hopi placa.
E ta hopi costoso pa e papelnan, e printing, e envelop cu tin cu usa. Tin cu paga servicio di post tambe pa parti nan. E ta sali gobierno tambe hopi placa pa genera tur e naheffingnan aki.
Djis e parti eynan ta hopi importante pa tene cuenta cu naheffing no ta algo cu ta necesario, si solamente e pago y e declaracion tuma luga corectamente.
