Home Parlamento Interes di hipoteca a baha, pues doñonan di cas por pidi nan...

Interes di hipoteca a baha, pues doñonan di cas por pidi nan banco pa baha esaki pa nan

3443
0
SHARE
- Advertisement -

Setty Christiaans:

ORANJESTAD  (AAN): Parlamentario Setty Christiaans a tuma nota di un rapport di Banco Central y e ta haya cu ta hopi importante como parlamentario pa yuda informa y educa pueblo.

Pesey durante di e conferencia di tur Diaranzon di MEP, el a dicidi di comparti informacion valioso na pueblo.

Segun Christiaans, e rapport ta papia di e estado di operacion di e banconan comercial na Aruba.

Segun Banco Central cos ta bayendo bon cu e banconan.

Cu ta asina of no, tin cierto informacion cu pueblo mester sa cu e por uza.

Den e caso aki Christiaans a indica cu un di e tareanan di Gobierno y Parlamento ta pa crea un ampliacion di poder di compra di pueblo.

Specialmente door cu tur cos den e mundo actual ta mas caro, esaki ta algo valioso.

Pesey e parlamentario a bin cu un tipo cu quizas hopi hende no sa di dje, of no sa bon con pa probecha di dje.

Christiaans a splica por ehempel cu hopi biaha e gastonan mas grandi pa hende ta pagamento di hipoteca of huur.

“Mi kier a para keto na e parti di hipoteca, pasobra si por ehempel mi a traha un cas 20 aña pasa, mi por a haya un hipoteca na un interes di 10.5%”.

“Cu tempo esaki a bin ta baha, pero logicamente e banconan comercial no ta iforma bo, pasobra mas bo interes ta, mas nan como banco ta gana”.

“E interes awor a baha drasticamente, compara cu antes”.

Esaki segun e parlamentario, kende a indica cu 15 aña pasa interes riba hipoteca di cas tabata na 10.3%, 10 aña pasa esaki tabata na 9.1%, 5 aña pasa e tabata 7% y aña pasa esaki a bira 5.7%.

“Mi mensahe na pueblo ta cu si bo ta pagando un hipoteca cu un interes di por ehempel 10%, bo por traha un carta pa pidi banco pa baha esaki na locual mercado su interes ta actualmente”.

“Esaki lo pone cu bo ta bay tin mas placa den bo cartera tur luna pa cumpra of paga otro cosnan”, segun Christiaans.

“Si interes den 20 aña casi a baha te na mitad, mi ta haya cu locual un persona ta paga na interes di hypotheek tambe tin cu baha”.

“Logicamente banco no ta proactivo, apesar cu nan ta bin cu cierto ‘specials’ si”.

“Sinembargo, bo mes por bira proactivo y manda bo banco un carta pa baha bo hipoteca”, segun e parlamentario.

 

- Advertisement -

DUNA COMENTARIO

Please enter your comment!
Please enter your name here